Libre na ang lahat ng online fund transfers ng mga retail clients ng Land Bank of the Philippines (LANDBANK) simula Hulyo 7, 2026, bilang bahagi ng pagpapalawak ng digital banking services ng bangko.
Sa ilalim ng bagong polisiya, wala nang transfer fees para sa mga transaksyong isasagawa gamit ang LANDBANK Mobile Banking App (MBA) at iAccess sa pamamagitan ng InstaPay at PESONet. Saklaw din ng zero-fee policy ang mga kliyente ng Overseas Filipino Bank (OFBank) saan mang panig ng mundo.
Ayon sa LANDBANK, kasunod ito ng nauna nitong hakbang noong Hunyo 1, 2026 na alisin ang bayad sa mga kwalipikadong person-to-government (P2G) transactions gamit ang QRPh.
Sinabi ni LANDBANK Chairman at Finance Secretary Frederick D. Go na makatutulong ang hakbang upang mabawasan ang gastusin ng mga Pilipino.
“Every peso saved on transfer fees is a peso that Filipino families can spend on their daily needs and that businesses can reinvest in growth,” ani Go.
Dagdag pa niya, umaasa siyang mas marami pang financial institutions ang magbababa o tuluyang mag-aalis ng bayarin sa digital transactions upang maging mas abot-kaya ang mga serbisyong pinansyal.
Samantala, sinabi ni LANDBANK President at CEO Lynette V. Ortiz na layunin ng programa na gawing mas accessible at mas mura ang digital banking para sa mga manggagawa, maliliit na negosyante, at overseas Filipinos.
“By expanding our zero-fee digital framework from government payments to everyday retail transfers, we want to ensure that our banking services directly uplift our workers, small business owners, and overseas Filipinos,” ani Ortiz.
Ayon sa LANDBANK, bahagi ang inisyatibang ito ng pagsuporta sa layunin ng administrasyon ni Pangulong Ferdinand R. Marcos Jr. na palawakin ang digital financial services at isulong ang mas episyente, abot-kaya, at madaling ma-access na mga serbisyong pagbabangko para sa lahat ng Pilipino.
Discussion about this post