Pormal nang inilunsad sa Romblon District Hospital (RDH) ang Integrated Hospital Operations and Management Information System (iHOMIS) bilang bahagi ng patuloy na digitalization ng serbisyong pangkalusugan sa lalawigan.
Kasabay ng blessing ceremony noong Hulyo 21 ang pagbabasbas sa bagong iHOMIS system, computer equipment, at gusali ng ospital na inaasahang magpapabilis sa mga proseso, magpapahusay sa pamamahala ng datos ng mga pasyente, at magbibigay ng mas episyente at de-kalidad na serbisyong medikal.
Malaki ang naging ambag ng Department of Science and Technology (DOST) sa proyekto matapos itong magkaloob ng humigit-kumulang ₱2 milyong pondo para sa mga server at computer equipment na kinakailangan sa pagpapatupad ng iHOMIS. Samantala, isinagawa ng RBS Software Solutions ang installation ng server para sa iHOMIS+ noong Hulyo 15.
Ayon kay Governor Trina Firmalo-Fabic, mahalagang hakbang ang pagpapatupad ng iHOMIS sa modernisasyon ng mga pasilidad pangkalusugan sa Romblon.
“Bahagi ito ng patuloy nating pagsisikap na mapabuti ang ating mga pasilidad, mapabilis ang mga proseso, at maihatid ang mas maayos at de-kalidad na serbisyong pangkalusugan sa bawat Romblomanon,” ani ng gobernador.
Dinaluhan ang blessing ceremony ng mga department heads, pamunuan ng ospital, health workers, medical professionals, engineers, at iba pang kawani ng Provincial Government of Romblon.
Dagdag pa ni Firmalo-Fabic, target ding mailunsad sa Romblon Provincial Hospital ang kaparehong Electronic Medical Records (EMR) system sa susunod na taon sa pakikipagtulungan ng DOST, bilang bahagi ng patuloy na pagpapalawak ng digital health services sa lalawigan.
