Inatasan ng Department of the Interior and Local Government (DILG) ang lahat ng local government units (LGUs) sa bansa na magtatag ng Safer School Zones (SSZs) at pakilusin ang 277,744 barangay tanod upang mapalakas ang seguridad ng mga mag-aaral sa paligid ng mga paaralan.
Ang direktiba ay inilabas kasunod ng tumitinding pangamba ng publiko matapos ang mga nagdaang insidente ng karahasan na kinasangkutan ng mga mag-aaral sa iba’t ibang bahagi ng bansa.
Ayon sa DILG, layunin ng programa na maprotektahan ang mga mag-aaral laban sa krimen, karahasan, panganib sa kalsada, at iba pang banta sa loob at paligid ng mga paaralan sa pamamagitan ng mas mahigpit na koordinasyon ng mga LGU, paaralan, law enforcement agencies, at mga komunidad.
“Schools must remain places of learning, not places of fear. Through Safer School Zones, local governments, barangays, schools, law enforcement agencies, parents, and communities will work together to better protect every learner,” ayon sa DILG.
Sa ilalim ng Memorandum Circular No. 2026-037, inatasan ang mga gobernador, alkalde, punong barangay, Philippine National Police (PNP), at iba pang stakeholders na paigtingin ang mga hakbang sa kaligtasan sa paligid ng mga pampubliko at pribadong paaralan.
Kabilang sa mga ipatutupad ang pagtukoy at pagtugon sa mga panganib sa school zones tulad ng delikadong kalsada, kakulangan sa pedestrian facilities, mga sasakyang mabilis magpatakbo, panganib sa sunog at kalamidad, at iba pang banta sa kaligtasan ng mga mag-aaral.
Hinikayat din ang mga LGU na magpatibay o magpalakas ng mga lokal na ordinansa kaugnay ng traffic management, pedestrian safety, crime prevention, violence prevention, at pagpapanatili ng kaayusan sa paligid ng mga paaralan.
Sa ilalim ng programa, magsisilbing force multipliers ang mga barangay tanod sa pamamagitan ng pagpapatrolya, pagpapanatili ng police visibility, pagtulong sa traffic management, pagbibigay ng agarang tulong, at mabilis na pag-uulat ng mga insidente sa mga kinauukulang ahensya.
Nilinaw naman ng DILG na ang operasyon ng mga barangay tanod ay limitado lamang sa labas ng school premises, maliban kung pahihintulutan ng pamunuan ng paaralan o kung kinakailangan ang agarang pagtugon sa isang insidente. Nananatili ring hindi armado ang mga barangay tanod at kinakailangang i-refer agad sa pulisya, bumbero, medical responders, o iba pang kaukulang ahensya ang mga insidenteng nangangailangan ng espesyal na aksyon.
Batay sa datos ng DILG, may 277,744 barangay tanod na nakatalaga sa 42,010 barangay sa buong bansa na inaasahang tutulong sa pagpapatupad ng Safer School Zones.
Ayon sa DILG, bahagi ang inisyatiba ng mas malawak na layunin ng administrasyon ni Pangulong Ferdinand R. Marcos Jr. na mapanatiling ligtas ang mga paaralan sa pamamagitan ng koordinadong hakbang ng pamahalaan at komunidad upang matiyak na makapag-aral ang bawat mag-aaral sa isang ligtas at maayos na kapaligiran.
