Nanawagan ang Philippine National Police (PNP) sa mga magulang, guro, at school administrators na mas mahigpit na bantayan ang paggamit ng social media at mga gadget ng mga kabataan kasunod ng insidente ng pamamaril sa isang paaralan sa Tacloban City na ikinasawi ng tatlong estudyante.
Ayon kay PNP Chief Police General Jose Melencio Nartatez Jr., mahalagang gampanan ng mga magulang at guardian ang kanilang papel sa pagsubaybay sa online activities ng kanilang mga anak upang maagap na matukoy ang mga posibleng senyales ng marahas na pag-uugali.
“Parents and guardians serve as the first line of defense. They must be present and vigilant in their children’s digital lives,” ani Nartatez.
Nanawagan din siya sa mga guro at school administrators na makipagtulungan sa mga awtoridad sa pagtukoy ng mga pagbabago sa asal at interes ng mga estudyante na maaaring mangailangan ng agarang interbensyon.
Ang panawagan ng PNP ay kasunod ng pamamaril sa loob ng San Jose National High School sa Tacloban City noong Hunyo 23 kung saan tatlong estudyante ang nasawi at 13 iba pa ang nasugatan.
Dalawang menor de edad ang nasa kustodiya ngayon ng mga awtoridad kaugnay ng insidente.
Ayon sa imbestigasyon ng pulisya, isa sa mga suspek ang umano’y nag-post ng mga video sa social media na may kaugnayan sa baril at karahasan bago maganap ang insidente, kabilang ang video kung saan makikita itong nagpaputok ng baril.
Sinabi ni Nartatez na maaaring magsilbing babala ang mga pagbabago sa asal ng isang kabataan, kabilang ang paglayo sa pakikisalamuha, labis na pagkahilig sa mararahas na imahe, o paggamit ng mga salitang nagpapakita ng agresibong pag-iisip.
Kasalukuyan ding sinusuri ng pulisya kung may kinalaman ang bullying at iba pang social factors sa naganap na pamamaril.
Ayon sa PNP, ang hakbang ay bahagi ng direktiba ni Pangulong Ferdinand Marcos Jr. at ng Department of the Interior and Local Government (DILG) na palakasin ang community-based prevention measures at maagang pagtukoy sa mga posibleng insidente ng karahasan na kinasasangkutan ng mga kabataan.
Nakikipag-ugnayan na rin ang PNP sa Department of Education (DepEd) upang maisapinal ang mga karagdagang safety protocols para sa mga paaralan sa buong bansa.
Binigyang-diin ni Nartatez na mahalaga ang aktibong pakikilahok ng mga magulang, guro, at iba pang nakatatanda sa buhay ng mga kabataan upang mapanatiling ligtas ang mga paaralan at maiwasan ang mga kahalintulad na insidente sa hinaharap.
