Nahaharap sa kasong frustrated murder ang isang 36-anyos na lalaki matapos umanong sugurin at tagain ang kinakasama ng dati niyang live-in partner sa Barangay Poblacion, Cajidiocan, Romblon noong gabi ng Hunyo 12.
Batay sa ulat ng Cajidiocan Municipal Police Station (MPS), bandang alas-10:30 ng gabi nang sapilitang pumasok ang suspek sa bahay ng biktima habang armado ng itak.
Ayon sa imbestigasyon, agad umanong tinaga ng suspek ang biktima na tinamaan sa kaliwang balikat. Nagkaroon ng komprontasyon sa pagitan ng dalawa habang sinisikap ng babae na awatin ang mga ito.
Sa gitna ng insidente, nakakuha umano ng bote ang biktima at ipinukpok ito sa ulo ng suspek. Natigil lamang ang kaguluhan nang dumating ang mga kapitbahay at umawat sa kanila.
Agad na isinugod sa ospital ang biktima upang mabigyan ng medikal na atensyon.
Matapos matanggap ang ulat, inatasan ni Police Captain Mary Jade Gaca, officer-in-charge ng Cajidiocan MPS, ang mga pulis na rumesponde sa lugar. Naaresto ang suspek at dinala sa himpilan ng pulisya para sa kaukulang proseso.
Noong Hunyo 15, pormal na sinampahan ng kasong frustrated murder ang suspek sa tanggapan ng Romblon Provincial Prosecutor's Office matapos ang isinagawang inquest proceeding.
