Umabot na sa 23,271 child laborers sa MIMAROPA ang nabigyan ng tulong at social protection services ng Department of Labor and Employment (DOLE) mula 2021 hanggang 2025 sa ilalim ng Child Labor Prevention and Elimination Program (CLPEP).
Batay sa ulat ng DOLE-MIMAROPA sa isinagawang Regional Council Against Child Labor meeting noong Mayo 8, kabilang ang mga natulungan sa kabuuang 53,242 referrals na naitala sa rehiyon sa nakalipas na limang taon.
Ayon kay CLPEP Focal Joanna Paula Ulep, nagsagawa ang ahensya ng information at service caravans sa Marinduque, Romblon, Oriental Mindoro, Occidental Mindoro, at Palawan katuwang ang mga lokal na pamahalaan, national government agencies, paaralan, at civil society organizations.
Kasama rin sa isinagawang interventions ang profiling at monitoring ng mga batang kabilang sa vulnerable communities upang matukoy ang mga kinakailangang programa at serbisyo para sa kanila.
Iniulat din ni Ulep ang implementasyon ng Project Angel Tree na namahagi ng educational supplies, food packs, hygiene kits, at iba pang assistance sa mga natukoy na child laborers.
Sa ilalim ng programa, nai-refer din ang mga pamilya ng mga bata sa iba’t ibang partner agencies para sa educational support, social welfare services, livelihood assistance, at emergency employment programs.
Nakipagtulungan din ang DOLE sa Department of Social Welfare and Development, Department of Trade and Industry, Department of Education, Technical Education and Skills Development Authority, at mga lokal na pamahalaan upang maihatid ang integrated services para sa mga bata at kanilang pamilya.
Nagpatupad din ang ahensya ng livelihood assistance at skills training sa ilalim ng DOLE Integrated Livelihood Program upang matulungan ang mga pamilya na magkaroon ng alternatibong pagkakakitaan.
Samantala, sinabi ni Emerito A. Narag na patuloy na pinalalakas ng ahensya ang convergence efforts kasama ang iba’t ibang partner institutions upang matugunan ang kahinaan ng mga manggagawa at pamilya sa pamamagitan ng livelihood assistance, TUPAD, SPES, at iba pang social protection programs.
Para naman sa 2026, sinabi ni Narag na palalawakin pa ng DOLE-MIMAROPA ang community-based monitoring systems, advocacy campaigns sa geographically isolated at disadvantaged areas, at dagdagan pa ang service caravans at Project Angel Tree activities sa mga high-risk communities.
Layunin din umano ng ahensya na mapanatili ang mga partnership upang matiyak na mananatili sa paaralan ang mga bata at hindi mapapasok sa mapanganib na uri ng paggawa.
Ayon sa DOLE-MIMAROPA, patuloy nilang isinusulong ang layunin na magkaroon ng child labor-free MIMAROPA sa pamamagitan ng tuloy-tuloy na inter-agency collaboration at social protection programs para sa mga bata at kanilang pamilya.
