Arestado ang tatlong indibidwal sa isinagawang operasyon ng Odiongan Municipal Police Station kaugnay ng paglabag sa Illegal Gambling Law sa Barangay Mayha nitong April 12.
Naganap ang operasyon bandang alas-3:45 ng hapon matapos makatanggap ng ulat mula sa isang concerned citizen hinggil sa umano’y nagaganap na ilegal na sugal, partikular ang larong “Tong-its,” sa nasabing lugar.
Sa direktiba ni Major Chisi Fadergao ng Odiongan Municipal Police Station, agad na rumesponde ang mga operatiba upang beripikahin ang ulat.
Pagdating sa lugar, nadatnan ang ilang indibidwal na aktibong nagsusugal, dahilan upang agad silang arestuhin ng mga pulis matapos magpakilala.
Nakumpiska mula sa mga suspek ang perang pusta na nagkakahalaga ng ₱860, isang mesa, tatlong upuan, at isang set ng baraha na ginamit sa sugal.
Dinala ang mga naaresto at ang mga nakuhang ebidensya sa Odiongan MPS para sa kaukulang dokumentasyon at disposisyon.
Pinuri naman ni Provincial Director Police Col. Rexton Sawi ang mabilis na aksyon ng mga operatiba at muling iginiit ang pagpapatuloy ng kampanya laban sa ilegal na sugal sa lalawigan.
Ayon kay Sawi, patuloy na kikilos ang pulisya sa mga ulat mula sa komunidad at hinihikayat ang publiko na makipagtulungan sa mga awtoridad upang mapanatili ang kaayusan at kapayapaan sa kanilang lugar.
