Mas may oras ang mga taxpayer na makumpleto ang kanilang mga isusumiteng dokumento nang walang ipapataw na penalties matapos ianunsyo ni Pangulong Ferdinand R. Marcos Jr. nitong Martes ang pagpapalawig ng deadline ng filing ng 2025 Annual Income Tax Returns mula Abril 15 hanggang Mayo 15.
Sa isang post sa Facebook account ni Bongbong Marcos, sinabi ng Pangulo na pinalawig ang deadline upang mabigyan ng sapat na panahon ang mga taxpayer na makapag-file nang maayos, kasama ang lahat ng kinakailangang dokumento, at nang walang multa o surcharge.
“Pinalawig natin ang deadline ng filing ng 2025 Annual Income Tax Returns mula April 15 hanggang May 15, 2026. Mas may oras ang bawat taxpayer na makapag-file nang maayos, kasama ang lahat ng kailangang dokumento, at walang ipapataw na penalties,” saad ng post.
Maaaring mag-file ang mga taxpayer sa pamamagitan ng Bureau of Internal Revenue (BIR) electronic platforms o sa mga authorized agent banks.
“Ginawa natin ito para mas magaan ang pagbabayad ng bawat Pilipino, lalo na sa panahong ramdam ang pagtaas ng presyo ng langis,” dagdag ng naturang post.
Binigyang-diin din sa post na tuloy-tuloy ang mga hakbang ng pamahalaan upang maibsan ang pasanin ng mga Pilipino sa kanilang araw-araw na pamumuhay, kasabay ng pagpapatuloy ng mga programang tumutugon sa iba’t ibang hamon ng publiko. | PND
