Umabot sa 7,282 pasyente ang napagsilbihan ng SM Foundation sa serye ng medical missions na isinagawa noong March 2026 sa iba’t ibang komunidad sa bansa, kabilang ang mga bayan ng Odiongan at Looc sa Romblon.
Sa pakikipagtulungan sa mga katuwang na organisasyon tulad ng Aboitiz Renewables, BDO Network Bank, Mowelfund, Watsons Philippines, National University, at SM Supermalls, naihatid ang libreng konsultasyon, gamot, at iba pang serbisyong medikal sa mga komunidad na may limitadong access sa healthcare.
Kabilang sa mga lugar na napagsilbihan ang Victoria at Bulalacao sa Oriental Mindoro; Bay sa Laguna; Novaliches at Quezon City; Odiongan at Looc sa Romblon; gayundin ang Bauan, San Jose, at Laurel sa Batangas.
Bahagi ang mga aktibidad ng patuloy na health and wellness program ng SM Foundation na nakatuon sa pagpapalapit ng serbisyong medikal, lalo na sa mga komunidad na kulang sa pasilidad pangkalusugan.
Ayon kay SM Foundation Health and Medical Programs Executive Director Connie Angeles, nananatiling mahalaga ang access sa serbisyong pangkalusugan at sa pamamagitan ng pakikipagtulungan sa iba’t ibang sektor ay mas napapalawak ang naabot ng kanilang programa.
Sa kabuuan, halos 1.4 milyong pasyente na ang napagsilbihan ng SM Foundation sa buong bansa sa pamamagitan ng kanilang mga medical mission, bilang bahagi ng kanilang patuloy na layuning mapabuti ang kalusugan at kapakanan ng mga komunidad.
