Sugatan ang isang sibilyan matapos madamay sa barilan sa pagitan ng pulisya at isang armadong lalaki sa Sitio Dalingdingan, Barangay Taboboan, Odiongan kahapon ng hapon, April 5.
Batay sa pinakahuling ulat ng Romblon Police Provincial Office, rumesponde ang mga tauhan ng Odiongan Municipal Police Station matapos makatanggap ng impormasyon na armado umano ng 12-gauge shotgun ang suspek at nagbabanta sa kanyang mga kapitbahay.
Pagdating sa lugar, nakasalubong ng mga pulis ang suspek na agad umanong nagpaputok sa mga rumespondeng awtoridad, dahilan upang magkaroon ng palitan ng putok.
Sa gitna ng insidente, isang residente ang tinamaan ng bala.
Sa ulat ng pulisya, matapos umanong mag-malfunction ang shotgun ng suspek, bumunot pa umano ito ng isa pang maikling baril at muling nagpaputok bago tumakas patungo sa bulubunduking bahagi ng Barangay Taboboan.
Samantala, ayon sa pamilya ng sugatang sibilyan, hindi umano sila kumbinsido na mula sa baril ng suspek ang balang tumama sa kanilang kaanak.
Agad naman siyang isinugod sa ospital nang mga tauhan ng Municipal Disaster Risk Reduction and Management Office.
Agad na nagsagawa ng hot pursuit operation ang pinagsanib na puwersa ng Odiongan Municipal Police Station, Romblon PMFC SWAT Team, at Patrol Base Romblon Delta Company ng 76th Infantry Battalion ng Philippine Army para sa posibleng pagdakip sa suspek.
Nakarekober naman ang mga awtoridad ng isang basyo ng 12-gauge shotgun at apat na live ammunition.
Inihahanda na rin ang kaukulang kaso laban sa suspek para sa pagsasampa sa Provincial Prosecutor’s Office.
Patuloy pa ang imbestigasyon ng mga awtoridad kaugnay ng insidente.
