Nanumpa si Corcuera Vice Mayor Aubrey Fondevilla bilang National Vice President for Luzon ng Vice Mayors’ League of the Philippines sa isang seremonya na pinangunahan ni Pangulong Ferdinand R. Marcos Jr. sa President’s Hall ng Malacañang Palace.
Kasabay ng panunumpa ng mga bagong opisyal ng VMLP, nangako ang Pangulo na tutugunan ng pamahalaan ang mga hamong kinakaharap ng mga local government units (LGUs), kabilang ang kakulangan sa kapasidad sa administrasyon, pananalapi, at teknikal na aspeto na nakaaapekto sa paghahatid ng serbisyo.
Ayon sa Pangulo, isinusulong ng pamahalaan ang pag-amyenda sa Local Government Code katuwang ang Union of Local Authorities of the Philippines, Department of the Interior and Local Government, at Department of Economy, Planning, and Development upang mapabuti ang pamamahala at pananagutan ng mga LGU. Batay sa datos na binanggit, 29 porsyento lamang ng LGUs ang nakapasa sa Seal of Good Local Governance noong 2023, habang marami pa ang may kakulangan sa pamamahala ng pondo, kahandaan sa sakuna, at serbisyong panlipunan.
Inihayag din ng Pangulo na 64 porsyento ng LGUs noong 2021 ay umaasa sa National Tax Allotment, habang 71 porsyento ng kanilang kita ay mula sa panlabas na pinagkukunan. Binanggit din niya ang mga hamon sa digital governance gaya ng mahinang internet, kakulangan sa ICT, at hindi malinaw na paghahati ng tungkulin sa pagitan ng pambansa at lokal na pamahalaan.
Bilang tugon, pinapalakas ng administrasyon ang koordinasyon ng pambansa at lokal na pamahalaan at itinutulak ang digitalisasyon ng serbisyo sa pamamagitan ng Electronic LGU System o eLGU. Kabilang din sa mga hakbang ang pagpapatupad ng Automatic Income Classification of LGUs Act at pagpapalawak ng Local Government Support Fund sa ilalim ng programang “Sa Bagong Pilipinas, Bawat Bayan Makikinabang.”
Kasama sa mga nakaplanong tulong ang pondo para sa mahahalagang proyekto tulad ng distribusyon ng bigas, imprastraktura sa kalusugan, at elektripikasyon sa kanayunan. Maglalaan din ng tulong sa mga barangay sa pamamagitan ng Socio-Civic Projects Fund kung saan bawat barangay ay makatatanggap ng tig-P100,000 na educational grant at kaparehong halaga para sa mga proyektong pang-imprastraktura.
Itinatag noong 1988 sa Quezon City, ang VMLP ay organisasyon ng lahat ng bise alkalde sa bansa na may 1,634 miyembro. Layunin nitong magsilbing plataporma para sa kolaborasyon, pagpapalakas ng kakayahan sa paggawa ng batas, at pagsusulong ng epektibong lokal na pamamahala.
