Umaaray ang ilang negosyante sa isla ng Sibuyan dahil sa kakulangan ng suplay ng kuryente sa mga nakalipas na linggo, na nakaapekto sa kanilang operasyon at kita.
Ayon sa Romblon Electric Cooperative, nag-ugat ang problema sa pagkasira ng mga generator sets ng National Power Corporation (NPC), na siyang pangunahing pinagmumulan ng kuryente sa isla. Dahil dito, nagpatupad ng apat na oras na rotational brownout sa iba’t ibang lugar.
Isang negosyanteng nagtitinda ng yelo sa bayan ng San Fernando ang nagsabing malaki ang epekto ng pagkawala ng kuryente sa kanilang kabuhayan.
“Malaki po ang lugi namin kapag nawawala ang kuryente. Hindi namin mapanatili ang lamig ng yelo at nasisira ang ibang produkto. Apektado rin ang mga mangingisda na umaasa sa amin,” aniya.
Samantala, isang may-ari ng maliit na hotel sa Cajidiocan ang nagsabing naapektuhan din ang kanilang serbisyo sa mga bisita.
“Kapag brownout, hirap kami magbigay ng maayos na serbisyo. Kailangan pa naming gumamit ng generator na dagdag gastos. May mga bisita ring nagrereklamo o umaalis,” pahayag nito.
Sa paliwanag ni ROMELCO General Manager Engr. Rene Fajilagutan, ang kasalukuyang demand ng kuryente sa isla ay nasa 3 megawatts, kung saan 450 kilowatt ang nanggagaling sa hydro power at ang natitira ay mula sa diesel-fired generator sets ng NPC.
Gayunman, sinabi niyang naayos na ang problema sa mga generator sets noong gabi ng Abril 28 kaya wala nang ipinatutupad na rotational brownout sa kasalukuyan.
Dagdag pa ni Fajilagutan, inaasahan ang pagdating ng mga rental generator sets ng NPC sa May 1 na magsisilbing pansuporta sa suplay ng kuryente sa loob ng isang taon. Target umanong mapagana ang mga ito pagsapit ng unang linggo ng May. Ipinaliwanag din niya na kinakailangan ang mga bagong generator dahil hindi pa rin ganap na maaasahan ang mga lumang makina na nakaranas na ng pagkasira.
Samantala, tiniyak ng ROMELCO na sapat ang suplay ng diesel ng NPC para sa operasyon ng mga planta, at hindi umano magkakaroon ng brownout dulot ng kakulangan sa krudo.
Patuloy namang umaasa ang mga negosyante na magiging tuloy-tuloy na ang suplay ng kuryente upang makabawi sa kanilang naluging kita sa mga nagdaang araw.
