Iminungkahi ni Sangguniang Bayan Member Juvy Faderogaya na ipagpatuloy ng kasalukuyang administrasyon ng bayan ng Odiongan ang Barangay Caravan upang mas mailapit ang mga serbisyo ng pamahalaan sa mga residente ng 25 barangay.
Sa kaniyang privileged speech, sinabi ni Faderogaya na layunin ng nasabing programa na direktang maihatid sa komunidad ang iba’t ibang serbisyo tulad ng serbisyong pangkalusugan, social welfare assistance, civil registration, at legal consultation.
“[Ito ay kailangan] lalo na sa mga lugar na may limitadong access sa mga tanggapan sa gobyerno,” ayon sa konsehal.
Ayon pa kay Faderogaya, bago ito ihinto ay umaabot sa tinatayang 200 hanggang 300 residente ang napaglilingkuran sa bawat barangay sa tuwing isinasagawa ang caravan.
Aniya, kung maipatutupad ito sa lahat ng 25 barangay, maaaring umabot sa 5,000 hanggang 12,000 residente ang makinabang sa isang ikot ng programa.
Ipinunto rin ng konsehal na ang Odiongan ang isa sa naging modelo ng ibang bayan sa pagpapatupad ng barangay caravan, ngunit ito rin umano ang tumigil sa programa.
Dagdag pa niya, naipasa na bilang ordinansa ng Sangguniang Bayan ang nasabing programa, kaya’t may legal na batayan ang pagpapatuloy nito.
“Nauunawaan natin na ang bawat administrasyon ay may kanya-kanyang prayoridad, limitasyon sa pondo at stratehiya, ngunit mahalagang kilalanin ang mga programang napatunayang epektibo at may direktang pakinabang sa ating mga kababayan,” ani Faderogaya.
