Anim na persons deprived of liberty (PDLs) ang nagtapos ng Senior High School sa loob ng Romblon District Jail bilang bahagi ng programang pang-edukasyon para sa rehabilitasyon ng mga nakakulong.
Natapos ng mga PDL ang Academic Track sa ilalim ng Macario Molina National High School at pormal na iginawad ang kanilang diploma sa seremonya na ginanap sa loob ng pasilidad noong Abril 1.
Ayon kay JO3 Jeofrie Anglo, spokesperson ng Bureau of Jail Management and Penology MIMAROPA, ang pagtatapos ng mga PDL ay patunay sa patuloy na pagsisikap na maisulong ang rehabilitasyon sa pamamagitan ng edukasyon.
Pinayagan din ang mga miyembro ng pamilya ng mga nagtapos na dumalo sa seremonya bilang suporta sa kanilang tagumpay.
Isinagawa ang programa sa pakikipagtulungan ng mga guro mula sa Macario Molina National High School na nagsagawa ng regular na klase sa loob ng kulungan upang matiyak ang tuloy-tuloy na pag-aaral ng mga PDL.
Nagpasalamat naman ang mga nagtapos sa kanilang mga guro, jail personnel, at mga pamilya sa ibinigay na suporta sa kanilang pag-aaral. Binigyang-diin din ng kinatawan ng Department of Education ang kahalagahan ng edukasyon bilang bahagi ng rehabilitasyon at reintegrasyon ng mga PDL sa lipunan.
Samantala, sinabi ni Jail Senior Inspector Emely Mallen ng Romblon District Jail na plano pang palawakin ang education program sa pasilidad upang mas maraming PDL ang mabigyan ng pagkakataong makapag-aral at makapaghanda sa kanilang pagbabalik sa komunidad.
Discussion about this post