Arestado ang isang 50-anyos na lalaki matapos mahulihan ng hinihinalang ilegal na droga sa isinagawang buy-bust operation sa Barangay Tabing-Dagat nitong gabi ng Abril 28.
Ang suspek na itinago sa pangalang Reynaldo ay residente ng nasabing barangay.
Ayon sa Romblon Police Provincial Office, pinangunahan ng Odiongan Municipal Police Station – Drug Enforcement Unit katuwang ang Romblon Provincial Mobile Force Company at sa koordinasyon ng Philippine Drug Enforcement Agency (PDEA) MIMAROPA.
Sa isinagawang transaksyon, nakabili ang poseur-buyer ng isang sachet ng hinihinalang shabu mula sa suspek kapalit ng marked money na ₱500.
Narekober naman umano mula sa suspek ang dalawang heat-sealed plastic sachet na naglalaman ng puting kristal na substansya na pinaniniwalaang ilegal na droga, ang ginamit na buy-bust money, isang lalagyan ng sigarilyo, at isang bote ng stress reliever na pinaghinalaang ginamit bilang lalagyan ng droga.
Tinatayang may kabuuang bigat na 0.0315 gramo ang nakumpiskang substansya na may halagang humigit-kumulang ₱2,000 batay sa Dangerous Drugs Board valuation.
Dadalhin ang mga nakumpiskang ebidensya sa Romblon Provincial Crime Laboratory para sa pagsusuri.
Nahaharap ang suspek sa kasong paglabag sa Section 5 at Section 11 ng Article II ng Republic Act No. 9165.
Kasalukuyang nasa kustodiya ng pulisya ang suspek habang inihahanda ang pagsasampa ng kaso laban sa kanya.
