Umabot sa 23 metriko tonelada ng sibuyas mula sa San Miguel Multi-Purpose Cooperative ng Sablayan, Occidental Mindoro ang ipinadala sa Odiongan, Romblon sa pamamagitan ng KADIWA Program ng Department of Agriculture–MIMAROPA noong Abril 20.
Sa ulat ng DA MIMAROPA, layunin ng inisyatiba na matulungan ang mga magsasaka sa Sablayan, partikular ang mga kasapi ng kooperatiba, na maibenta ang kanilang ani at maiwasan ang pagkalugi dulot ng mababang presyo ng sibuyas sa merkado.
Naging katuwang ng ahensya sa distribusyon ang St. Vicente Ferrer Parish Multi-Purpose Cooperative, kung saan direktang naipagbili ang sibuyas sa mga mamimili sa lalawigan ng Romblon.
Nakibahagi rin sa aktibidad ang Agriculture Program Coordinating Office (APCO) ng lalawigan sa pangunguna ni APCO Head Annaliza Escarilla.
Batay sa datos, umabot na sa 16.2 metriko tonelada ng sibuyas ang naibenta sa lalawigan, na may katumbas na halagang tinatayang ₱580,000.
Ayon sa DA-MIMAROPA, bahagi ang KADIWA Program ng mga hakbang ng pamahalaan upang mapalapit ang mga produkto ng magsasaka sa merkado, habang tinitiyak ang mas abot-kayang presyo para sa mga konsyumer.
Discussion about this post