Pinaigting ng lokal na pamahalaan ng Odiongan ang seguridad sa bayan kaugnay ng paggunita ng Semana Santa at pagdiriwang ng Kanidugan Festival 2026 kasabay ng ika-179 na Founding Anniversary ng munisipalidad.
Ayon kay Mayor Roger Fodra, nakikipag-ugnayan na ang pamahalaang bayan sa Odiongan Municipal Police Station at humihiling na rin ng augmentation team mula sa Romblon Police Provincial Office upang magdagdag ng pwersa na magbabantay sa mga pangunahing lugar sa bayan sa panahon ng selebrasyon.
Sinabi ni Fodra na bagamat may epekto sa mga residente ang krisis sa petrolyo at pagtaas ng pamasahe sa mga barko, nananatiling inaasahan ang pagdami ng mga bakasyunista at turistang bibisita sa Odiongan sa Semana Santa at sa kasagsagan ng festival. Dahil dito, inihahanda na umano ang mga hakbang upang matiyak ang kaayusan at kaligtasan ng publiko.
Dagdag pa ng alkalde, nakatutok din ang mga awtoridad sa mga lugar na inaasahang dadagsain ng mga tao kabilang ang mga pantalan, pamilihan, lugar ng aktibidad ng festival, mga simbahan, at mga pasyalan. Pinaigting din ang koordinasyon sa mga barangay officials upang agad na matugunan ang anumang insidente.
Inihayag din ni Fodra na nakaantabay na ang incident management team ng bayan habang patuloy na binabantayan ng Municipal Disaster Risk Reduction and Management Office ang kabuuang sitwasyon.
Nakahanda rin umano ang mga response team sakaling magkaroon ng emergency o iba pang insidente sa panahon ng pagdiriwang katulad ng sunog.
Nanawagan naman ang lokal na pamahalaan sa publiko na makipagtulungan sa mga ipatutupad na seguridad, sumunod sa mga alituntunin, at manatiling mapagmatyag upang maging maayos at ligtas ang paggunita ng Semana Santa at selebrasyon ng Kanidugan Festival sa Odiongan.
