Nagbigay ng mahahalagang payo sa kapwa kalalakihan ang mga opisyal ng ERPAT-MOVE (Empowerment and Reaffirmation of Paternal Abilities – Men Opposed to Violence Everywhere) sa Odiongan, na layong palakasin ang responsableng pagiging ama at maiwasan ang karahasan sa loob ng tahanan.
Sa Kapihan sa PIA Romblon, binigyang-diin ni William Forcadas, kalihim ng ERPAT-MOVE Odiongan, ang kahalagahan ng pagiging mabuting ehemplo ng mga ama sa kanilang mga anak, lalo na sa usapin ng pag-inom ng alak.
“Dapat na-e-educate tayo sa tamang values bilang lalaki. Kapag lasenggo ang isang ama, hindi lang siya ang naaapektuhan kundi pati ang kanyang mga anak. Nakikita nila ‘yan at dadalhin nila habang sila’y lumalaki,” ani Forcadas.
Ayon sa kanya, maaaring gayahin ng mga anak ang maling gawi ng kanilang mga magulang, na posibleng magdulot ng problema sa hinaharap.
“Darating ang panahon na lalaki at magdadalaga ang mga anak mo. Kung tuloy-tuloy ang maling gawain, maaaring bumalik din ‘yan sa’yo balang araw,” dagdag niya.
Hinimok din ni Forcadas ang mga ama na ipakita ang magandang asal at tamang pag-uugali sa loob ng tahanan upang magsilbing gabay sa kanilang pamilya.
Samantala, ibinahagi naman ni Efren Astejada, ingat-yaman ng grupo, ang kanyang personal na karanasan bilang dating manginginom at ang naging pagbabago nito para sa kapakanan ng kanyang pamilya.
“Sa totoo lang, dati rin akong manginginom. Kaya ang payo namin, kung gusto mong mapaganda ang iyong pamilya, iwasan mo ang bisyo. Walang ama na ayaw gumanda ang buhay ng kanyang pamilya,” pahayag ni Astejada.
Ayon sa kanya, kung hindi man tuluyang maiwasan ang pag-inom, dapat itong gawin nang may kontrol at hindi naaapektuhan ang responsibilidad sa pamilya.
“Kung mahal mo ang pamilya mo, nandiyan ang respeto. Kapag may pagmamahal, kusang susunod ang respeto sa isa’t isa,” dagdag niya.
Binigyang-diin din ni Astejada ang prinsipyo ng kanilang organisasyon na nagsusulong ng respeto sa kababaihan bilang sukatan ng tunay na pagkalalaki.
“Palagi naming sinasabi sa aming mga miyembro—real men respect women. Paano ka rerespetuhin kung hindi mo rin ginagawa ang tama sa iyong pamilya?” aniya.
Patuloy ang kampanya ng ERPAT-MOVE sa Romblon upang hikayatin ang mas maraming kalalakihan na maging responsable, mapagmahal, at may malasakit sa kanilang pamilya, bilang mahalagang hakbang sa pagbuo ng ligtas at maayos na komunidad.
