Aprubado na sa ikatlo at pinal na pagbasa sa Mababang Kapulungan ng Kongreso ang House Bill No. 8464, na naglalayong tuluyang alisin ang ipinapataw na travel tax sa mga Pilipinong bumibiyahe palabas ng bansa.
Sa botohan, umabot sa 257 mambabatas ang pabor sa panukala, habang isa ang tumutol at isa ang nag-abstain.
Ayon kay Ferdinand Alexander “Sandro” Marcos, House Majority Leader at kinatawan ng Ilocos Norte, ang travel tax ay isang polisiya na nabuo sa ibang panahon kung kailan itinuturing pa lamang na pribilehiyo ng iilan ang paglalakbay sa eroplano.
Aniya, sa kasalukuyang panahon, nagiging dagdag pasanin na lamang ito sa mga ordinaryong Pilipino na bumibiyahe para sa trabaho, pamilya, o iba pang mahalagang dahilan.
Layunin ng panukala na tuluyang bawiin ang travel tax na ipinatutupad sa ilalim ng Presidential Decree No. 1183 at ilang probisyon ng Tourism Act of 2009.
Nauna nang isinama ang panukalang ito sa mga prayoridad ng Legislative-Executive Development Advisory Council, kasunod ng pagsuporta rito ni Pangulong Ferdinand “Bongbong” Marcos Jr..
Ayon sa Pangulo, maraming Pilipino ang bumibiyahe hindi lamang para sa bakasyon kundi para rin sa trabaho at agarang pangangailangan, kaya’t hindi na angkop ang karagdagang buwis na ito.
Samantala, sinabi ni Eleandro Jesus “Budoy” Madrona, kinatawan ng Romblon at chairperson ng House Committee on Tourism, na naaayon din ang panukala sa ASEAN Tourism Agreement na naglalayong alisin ang travel tax sa mga kasaping bansa upang mapadali ang paglalakbay sa rehiyon.
Sa kasalukuyan, ang travel tax ay nagkakahalaga ng ₱1,620 para sa economy class at ₱2,700 para sa business at first class passengers. Tinatayang umaabot sa ₱8 bilyon kada taon ang nalilikom mula rito.
Bahagi ng kita ay napupunta sa Tourism Infrastructure and Enterprise Zone Authority, habang 40 porsiyento ay napupunta sa Commission on Higher Education, at 10 porsiyento sa National Commission for Culture and the Arts.
Upang matiyak na hindi maaapektuhan ang operasyon ng mga ahensyang ito, nakasaad sa panukala na patuloy silang popondohan sa ilalim ng General Appropriations Act.
