Inilahad ang ilang nakaplanong proyekto ng pamahalaan para sa mga magsasaka sa lalawigan sa ginanap na 1st Provincial ARBO Summit sa Odiongan, Romblon nitong March 24.
Sa kanyang mensahe, sinabi ni dating San Agustin Mayor Denon Madrona, Chief of Staff ni Congressman Eleandro Madrona, na kabilang sa mga aprubadong proyekto para sa 2026 ang konstruksyon ng ilang farm-to-market roads (FMRs) na inaasahang magpapadali sa pagdadala ng mga produktong agrikultural mula sa mga sakahan patungo sa mga pamilihan.
Kabilang sa mga proyektong ito ang FMR sa Victoria, San Andres na nagkakahalaga ng P15 milyon, FMR sa Magsaysay, Santa Fe na may kaparehong halaga, FMR sa Manhac, Looc na P15 milyon, at FMR sa Agpudlos, San Andres na may P15 milyon ding pondo.
Ayon sa kanya, inaasahang maisasakatuparan ang mga proyektong ito sa loob ng taon upang mas mapalapit ang mga kalsada sa mga sakahan at mapabilis ang transportasyon ng mga ani ng mga magsasaka.
Ipinaliwanag ni Madrona na mahalaga ang mga farm-to-market roads sa pagpapalakas ng sektor ng agrikultura, dahil nakatutulong ang mga ito upang mabawasan ang gastos sa transportasyon at maiwasan ang pagkasira ng mga produkto habang dinadala sa merkado.
Hinikayat din niya ang mga agrarian reform beneficiaries na pangalagaan at pagyamanin ang mga lupang ipinagkaloob sa kanila ng pamahalaan. Aniya, mahalagang gamitin ang mga lupang ito bilang pundasyon ng kanilang kabuhayan at hindi ibenta, upang matiyak ang pangmatagalang benepisyo para sa kanilang pamilya.
Binigyang-diin din sa summit ang kahalagahan ng pagtutulungan ng mga ahensya ng pamahalaan at mga organisasyon ng magsasaka upang higit pang mapalakas ang produksyon at kita sa sektor ng agrikultura sa lalawigan.
Ang naturang aktibidad ay nagsilbing plataporma upang mailapit sa mga ARBOs ang iba’t ibang programa at proyekto ng pamahalaan na nakatuon sa pagpapabuti ng kanilang kabuhayan at pagpapaunlad ng kanilang mga komunidad.
