Nanawagan sina Occidental Mindoro Governor Eduardo Gadiano at Rizal Mayor Sonny Pablo sa Senado, partikular sa Blue Ribbon Committee, na imbestigahan ang mga flood control projects sa kanilang lalawigan na bumagsak kahit bago pa lamang natapos.
Ayon kay Gov. Gadiano, personal niyang nakita sa inspeksiyon na tila substandard ang mga ginamit na materyales.
“Sa tingin ko mga substandard ang ginamit, parang walang bakal. Kung maayos ang pagkakagawa, hindi dapat guguho agad. Pera ng taumbayan ‘yan, sana ginawa nang maayos,” aniya.
Kaugnay nito, sinabi ni Mayor Pablo na dapat ay magkaroon ng pananagutan kung may naging pagkukulang.
“Gusto rin naming malaman ang totoo. Dapat simula pa lang, pare-pareho ang plano, hindi putol-putol at iba-iba ang disenyo,” dagdag ng alkalde.
Isa sa mga bumagsak na istruktura ay ang ₱45-milyong road dike sa kahabaan ng Busuanga River sa Sitio Lagnas, Barangay San Pedro, Rizal. Natapos umano ito noong Hulyo 2023 batay sa tala ng Sumbong Sa Pangulo website, ngunit ayon kay Barangay Chairman Ruben Laredo, ngayong taon lang ito tuluyang natapos.
May bahagi ng dike na hindi konektado sa isa pang dike, na may higit 100 metrong pagitan. Dahil dito, nangangamba ang mga residente na maaari pa ring pumasok ang tubig at masira ang kanilang mga sakahan. Sa kabilang bahagi, itinayo naman ang isa pang dike ngunit mas mataas at hindi naka-align sa nauna, dahil gawa ito ng ibang kontratista.
Sa Sablayan, Occidental Mindoro, ipinakita naman ni Barangay Chairman Dino Danseco ang bumagsak na flood control project sa Amnay River. Aniya, nagsimula nang gumuho ang istruktura noong nakaraang taon ngunit hindi naayos. Mas lalo pa umano itong nasira nang tumama ang bagyo at malalakas na ulan.
“Nanghihinayang kami sa pondo. Ang laki ng inilaan pero sa isang iglap, bumagsak. Pati sakahan namin, natabunan ng baha,” ayon kay Danseco. Dagdag pa niya, ngayong 2025 lalo nang lumala ang pagbaha dulot ng Bagyong Emong at patuloy na malalakas na ulan.
Batay sa datos ni Gov. Gadiano, walo na ang bumagsak na flood control projects sa Occidental Mindoro na dapat agarang masuri at maimbestigahan ng Senado upang matiyak ang kalidad ng mga itinatayong proyekto sa probinsya.
