Nanawagan ang Department of Trade and Industry (DTI) Romblon sa mga lokal na fashion designers na ipakita ang kanilang talento at malikhaing ideya sa gaganaping fashion show sa Kanidugan Festival 2026 sa bayan ng Odiongan.
Sa pakikipagtulungan ng Philippine Coconut Authority (PCA) at ng pamahalaang bayan ng Odiongan, layunin ng kompetisyon na isulong ang sustainable fashion sa pamamagitan ng paglikha ng mga modernong kasuotan na inspirasyon ang industriya ng niyog.
Ayon sa DTI, itatampok din sa fashion show ang paggamit ng eco-friendly at locally-sourced materials, habang binibigyan ng pagkakataon ang mga Romblomanong designer na maipakita ang kanilang galing sa paggawa ng kasuotan.
Sa pahayag ng DTI Romblon, layunin ng naturang inisyatiba na suportahan ang lokal na talento, hikayatin ang inobasyon, at isulong ang sustainable practices sa fashion industry.
Bukas ang kompetisyon sa lahat ng 18 taong gulang pataas na may dugong Romblomanon.
Tatanggap ang 1st place winner ng ₱20,000, habang ₱10,000 naman ang para sa 2nd place at ₱5,000 para sa 3rd place. Mayroon ding ₱2,000 consolation prize, habang magkakaloob din ng Netizen’s Choice Award na nagkakahalaga ng ₱3,000.
Ayon sa DTI, maaaring magparehistro ang mga nais lumahok hanggang Marso 18, 2026, alas-5:00 ng hapon. Maaaring i-scan ng mga interesado ang QR code sa official poster o bisitahin ang Facebook page ng DTI Romblon para sa kumpletong mechanics at guidelines ng patimpalak.
