Patuloy na pinaiigting ng Department of Agrarian Reform (DAR) Romblon ang suporta nito sa mga Agrarian Reform Beneficiaries Organizations (ARBOs) sa pamamagitan ng iba’t ibang programa at interbensyon, kabilang ang kauna-unahang Provincial ARBO Summit na ginanap sa bayan ng Odiongan nitong March 24.
Ayon kay Engr. Rogelio Madarcos, Provincial Agrarian Reform Program Officer II (PARPO II) ng DAR Romblon, layunin ng naturang summit na mapalakas ang ugnayan ng mga samahan ng magsasaka at iba’t ibang ahensya ng pamahalaan upang higit na masuportahan ang kanilang kabuhayan at organisasyon.
Hinimok din ni Madarcos ang mga miyembro ng ARBOs na samantalahin ang pagkakataon upang makipag-ugnayan sa iba’t ibang ahensya ng gobyerno na maaaring magbigay ng tulong at programa para sa kanilang pag-unlad.
Binigyang-diin niya ang mahalagang papel ng mga ARBOs sa ekonomiya, partikular sa mga kanayunan, at ang pangangailangan ng pagtutulungan upang makamit ang mas matatag na kabuhayan.
Sa isinagawang summit, ibinahagi rin ng iba’t ibang ahensya ng pamahalaan ang kanilang mga programa at serbisyo na maaaring mapakinabangan ng mga ARBOs, kabilang ang mga inisyatiba sa agrikultura, kabuhayan, at pagpapaunlad ng organisasyon.
Ipinakita rin sa aktibidad ang iba’t ibang produktong likha ng mga ARBOs, tulad ng mga gulay, agri-products, at iba pang lokal na produkto na sumasalamin sa kakayahan at potensyal ng sektor ng agrikultura sa lalawigan.
Inaasahan ng DAR na sa pamamagitan ng ganitong mga inisyatiba ay mas mapapalakas ang kapasidad ng mga ARBOs at mapalawak ang kanilang oportunidad tungo sa mas inklusibong pag-unlad sa kanayunan.
