Aabot sa 354 benepisyaryo ng Pantawid Pamilyang Pilipino Program (4Ps) sa lalawigan ng Romblon ang matagumpay na nagtapos sa programa, na sumisimbolo ng kanilang paglipat mula sa pagiging benepisyaryo tungo sa mas matatag at self-reliant na pamumuhay.
Ang seremonya ng “Pugay Tagumpay” ay isinagawa sa bayan ng Odiongan, Romblon noong Marso 17, kung saan kinilala ang mga pamilyang nakumpleto ang mga itinakdang kondisyon ng programa.
Sa kabuuang bilang, 14 ang mula sa Ferrol, Romblon, 145 mula sa Looc, Romblon, 128 mula sa Odiongan, at 67 mula sa San Andres, Romblon. Sa mga ito, 225 ang tuluyang nagtapos sa programa matapos maitalang Level 3 o self-sufficient na ang kanilang pamilya batay sa Social Welfare and Development Indicator assessment.
Ayon sa Department of Social Welfare and Development Field Office MIMAROPA, ang pagtatapos ng mga benepisyaryo sa programa ay tanda ng panibagong yugto sa kanilang buhay, mula sa pagtanggap ng tulong pinansyal tungo sa pagiging mas handa sa mga hamon at oportunidad.
Bilang pagkilala, tumanggap ang mga nagtapos ng mga certificate of recognition bilang patunay ng kanilang pagsusumikap at tagumpay sa programa.
Nagpaabot din ng pagbati sina Romblon Governor Trina Firmalo-Fabic at Odiongan Mayor Roger Fodra Jr. sa mga nagsipagtapos.
Ayon kay Gobernador Fabic, ang tagumpay ng mga benepisyaryo ay patunay na sa tamang gabay at determinasyon, kayang baguhin ng bawat pamilya ang kanilang kinabukasan. Aniya, ang mga tinaguriang Level 3 households na handa nang maging self-reliant ay nagsisilbing inspirasyon hindi lamang sa pamahalaan kundi pati na rin sa iba pang komunidad.
Patuloy namang hinihikayat ng pamahalaan ang mga nagtapos na gamitin ang kanilang natutunan upang lalo pang mapaunlad ang kanilang kabuhayan at maging huwaran sa kanilang mga komunidad.
