Pinatutunayan ng ISIAH Hospital and Medical Center na hindi lamang para sa mayayaman ang serbisyo ng isang pribadong ospital, matapos magpatupad ng mga programang tumutulong sa mga pasyenteng kapos sa pera.
Ayon sa pamunuan ng ospital, layunin nilang maipakita sa komunidad na may lugar din sa pribadong pagamutan ang mga mahihirap na pasyente, lalo na ang mga nangangailangan ng agarang gamutan ngunit walang sapat na pambayad.
Sa mga naunang ulat, ilang pasyente na ang tinulungan ng ISIAH Hospital sa pamamagitan ng zero-balance billing, kung saan pinapatawad ang natitirang bayarin upang makalabas na ng ospital ang pasyente.
Sa panayam, sinabi ni ISIAH Hospital and Medical Center CEO Diven Dimaala na bahagi ng kanilang misyon ang gawing mas abot-kaya ang serbisyong medikal para sa komunidad.
“Hindi namin tinitingnan kung may pera o wala ang pasyente. Ang mahalaga, mabigyan sila ng tamang gamutan sa tamang oras,” ani Dimaala.
Ayon pa sa kanya, patuloy silang magsisikap na makapaghatid ng serbisyong may malasakit at abot-kaya para sa lahat ng nangangailangan.
Ang ISIAH Hospital ang nag-iisang private hospital sa Romblon na level 1 facility na tumatanggap ng mga pasyenteng nangangailangan ng pangunahing serbisyong medikal. Kabilang sa mga serbisyong iniaalok nito ang 24-oras na emergency room, in-patient services, minor at major surgical procedures, laboratory at diagnostic services, radiology, pharmacy, at maternity care.
Patuloy namang hinihikayat ng pamunuan ng ospital ang publiko na huwag mag-atubiling lumapit sa kanila, lalo na sa oras ng pangangailangan, dahil bukas umano ang kanilang serbisyo para sa lahat.
