Mas pinalalakas ng Tourism Promotions Board (TPB), katuwang ang Department of Tourism – MIMAROPA at ang Romblon Provincial Tourism Development and Culture Office, ang ugnayan ng lalawigan ng Romblon sa mga travel and tour operator mula sa iba’t ibang panig ng bansa.
Nitong linggo ay nagdala ang TPB ng humigit-kumulang 20 travel at tour operator sa Romblon para sa isang familiarization tour.
Layunin ng aktibidad na maiparanas mismo sa mga operator ang mga destinasyon, komunidad at natatanging karanasan na iniaalok ng mga isla ng Romblon.
Kabilang sa mga binisita ng grupo ang kilalang Bonbon Beach, ang Looc Marine Refuge and Sanctuary, ang makasaysayang Fuerza San Andres, pati ang mga pagawaan ng marble souvenirs na isa sa ipinagmamalaking produkto ng lalawigan.
Ipinaliwanag ni Provincial Tourism Officer Anthony Kim Faderon na mahalaga ang papel ng mga operator sa pagbuo ng mga tour package na akma sa kani-kanilang merkado.
Aniya, iba-iba ang market profile na hinahawakan ng mga travel agency, kabilang ang mid to high-end international markets, kaya sinusuri nila kung ang mga aktibidad at pasilidad sa Romblon ay tumutugma sa pangangailangan ng kanilang kliyente.
Dagdag pa niya, mas marami na ngayong pagpipilian ang Romblon pagdating sa mga produkto at karanasan sa turismo, kaya mas kaya na nitong tumugon sa mas malawak na merkado. Malaki rin aniya ang naitutulong ng programa ng TPB dahil mismong mga travel agency na nagbebenta ng mga tour sa labas ng bansa ang kanilang dinadala sa lalawigan.
Inaasahan na sa pagtatapos ng familiarization tour ay makabubuo ang mga operator ng mga panukalang tour package na isasama ang Romblon bilang bahagi ng kanilang mga alok na destinasyon sa Pilipinas.
Kasabay nito, tinutulungan din ng pamahalaan na maiugnay ang mga lokal na tour operator ng Romblon sa mga operator sa labas ng probinsya upang mas maging maayos at tuluy-tuloy ang paglalakbay ng mga turista patungo sa lalawigan.
Discussion about this post