Tumanggap ng pondo ang pitong bayan sa Romblon sa ilalim ng Philippine Multisectoral Nutrition Project (PMNP) bilang suporta sa pagpapatibay ng mga programang pangkalusugan at nutrisyon sa lalawigan.
Kabilang sa mga benepisyaryo ang Banton, Cajidiocan, Calatrava, Corcuera, Ferrol, San Jose, at Santa Maria.
Isinagawa ang pag-release ng pondo sa DOH MIMAROPA Center for Health Development Regional Office sa pangunguna nina Regional Director Dr. Rodolfo Antonio M. Albornoz at Assistant Regional Director Dr. Raffy A. Deray.
Ang pondo ay bahagi na ng Performance-Based Grant (PBG) Tranche 2, kasunod ng matagumpay na implementasyon ng unang bahagi ng grant.
Ayon sa PMNP, nakatuon ang pondo sa pagpapalakas ng kakayahan ng mga lokal na pamahalaan na ipatupad ang kanilang aprubadong action plans na may malinaw at nasusukat na resulta, lalo na sa maternal, infant at child nutrition. Malaking tulong ito sa mga geographically isolated at disadvantaged areas sa Romblon kung saan limitado ang akses sa serbisyong pangkalusugan.
Mas pinaigting din sa ikalawang tranche ang beripikasyon ng mga programa. Hindi lamang dokumento ang sinuri kundi pati ang aktuwal na epekto sa mga sambahayan. Sa pamamagitan ng PMNP Case Management System at Household Convergence Scorecard, napatunayang naihahatid nang maayos ang mga serbisyong pangkalusugan at nutrisyon sa mga target na pamilya.
Isinagawa rin ang data quality checks at household validation upang matiyak ang katumpakan ng datos at maayos na paggamit ng pondo. Sinuri rin ang kalidad ng serbisyo at financial accountability ng mga LGU bilang bahagi ng performance indicators.
Muling binigyang-diin ng DOH MIMAROPA ang kahalagahan ng pagtutulungan ng pambansa at lokal na pamahalaan sa pagtugon sa malnutrisyon.
