Dumalo si Romblon Mayor Gerard Montojo sa pagdinig ng Senado kaugnay ng panukalang ibalik at palakasin ang 15-kilometrong municipal waters na nakalaan para sa maliliit na mangingisda.
Kinatawan ni Montojo ang lalawigan bilang chairman ng League of Municipalities of the Philippines–Romblon Chapter at nagpahayag ng matibay na paninindigan ng kanilang bayan laban sa pagpasok ng commercial fishing sa loob ng municipal waters.
Ayon sa alkalde, hindi papayagan ng pamahalaang lokal ng Romblon ang malalaking bangkang pangisda sa loob ng 15 kilometro mula sa baybayin, kahit pa may umiiral na desisyon ng Korte Suprema na nagbigay-daan sa interpretasyong maaaring makapangisda ang commercial vessels sa nasabing lugar.
Ang tinutukoy na desisyon ng Korte Suprema ay nagmula sa mga kasong kumukuwestiyon sa ilang lokal na ordinansa na nagbabawal sa commercial fishing sa municipal waters. Sa naturang pasya, pinayagan ang mga malalaking commercial fishing vessels na makapangisda sa loob ng 15 kilometro mula sa baybayin, na dati ay eksklusibong nakalaan lamang sa municipal o maliliit na mangingisda sa ilalim ng umiiral na polisiya ng pamahalaan.
Ayon sa mga lokal na opisyal at grupo ng mangingisda, posibleng magdulot ito ng matinding kompetisyon sa yamang-dagat, pagbaba ng huli ng maliliit na mangingisda, at pagkasira ng mga coral reefs at iba pang likas-yaman dahil sa mas malalaking lambat at mas malalakas na makina ng commercial vessels.
Bilang tugon, nagpatupad ang pamahalaang bayan ng Romblon ng Ordinance No. 13, Series of 2025, na nagdedeklara sa municipal waters bilang Eco-Tourism and Research Marine Protected Area. Sa ilalim ng ordinansa, kinakailangan munang kumuha ng permit mula sa munisipyo ang sinumang nais mangisda o magsagawa ng aktibidad sa loob ng nasabing karagatan.
Sa pagdinig, iginiit ni Montojo na mahalagang mapanatili ang proteksiyon sa municipal waters upang matiyak ang kabuhayan ng maliliit na mangingisda at ang pangangalaga sa yamang-dagat ng kanilang bayan.
Bahagi ang naturang pagdinig ng patuloy na pagsusuri ng Senado sa mga umiiral na polisiya hinggil sa municipal waters at sa mga panukalang magpapatibay sa karapatan ng maliliit na mangingisda sa bansa.
