Pinalawak ni Pangulong Ferdinand R. Marcos Jr. ang Local Government Support Fund (LGSF) upang higit pang patibayin ang mga pangunahing programa, kabilang ang karagdagang tulong sa bigas, pagpapahusay ng mga pasilidad pangkalusugan, pagpapatibay ng mga inisyatiba sa disaster preparedness, at pagpapabuti ng mga kritikal na imprastraktura gaya ng mga sistema ng enerhiya at suplay ng tubig.
Sa kanyang talumpati sa paglulunsad ng “Sa Bagong Pilipinas, Bawat Bayan Makikinabang” initiative sa Malacañan Palace nitong Lunes, muling iginiit ni Pangulong Marcos ang kanyang paninindigan na tiyaking bawat sentimo ng pondo ng bayan ay ginagastos nang wasto sa mga programang may direktang pakinabang sa mga Pilipino.
Sa halos PhP58 bilyong alokasyon sa LGSF para sa 2026, sinabi ng Pangulo na mahigit limang milyong pamilya ang inaasahang makatatanggap ng tig-60 kilo ng bigas na makatutulong sa pagpapababa ng kawalan ng katiyakan sa pagkain.
Popondohan din ng pinalawak na LGSF ang pagtatayo ng mga ospital at health stations, gayundin ang pagbili ng karagdagang kagamitang medikal, upang maging mas abot-kamay ang mga serbisyong pangkalusugan.
Binigyang-diin din ng Pangulo ang pangangailangang paigtingin ang disaster preparedness sa pamamagitan ng pagtatayo ng mga multi-purpose hall at pasilidad pampalakasan na maaaring magsilbing evacuation centers.
“Magsisisilbi ito na lugar para sa pagkatuto, pagsasanay ng mga atleta, at ligtas na masisilungan tuwing may sakuna,” ayon sa Pangulo.
Susuportahan din ng LGSF ang mga farm-to-market roads at lokal na road networks upang maging mas episyente at mas matipid ang kalakalan para sa mga nagbebenta at mamimili. “Makakatulong ito upang bumaba ang presyo ng mga bilihin at tumaas naman ang kita ng mga nagsasaka.”
Panghuli, makatutulong ang LGSF sa pagpapabuti ng mga water supply system at mga proyekto sa elektripikasyon sa buong bansa, upang matiyak ang mas maayos na access ng mamamayan sa malinis na tubig at mas ligtas na mga komunidad sa gabi.
