Pormal nang inilunsad ng Department of Social Welfare and Development (DSWD) ang “Walang Gutom” o Food Stamp Program sa lalawigan ng Romblon, kung saan napili ang bayan ng Odiongan bilang pilot area sa rehiyon ng MIMAROPA.
Kabuuang 94 na residente ng Odiongan ang unang tinukoy na mga benepisyaryo ng programa. Pinangunahan ni DSWD Undersecretary for Innovations and Program Development Group Edu Punay ang paglulunsad at pamamahagi ng tulong, na bahagi ng layunin ng pamahalaan na masiguro na walang Pilipinong magugutom.
Ayon kay Punay, layunin ng programa na magbigay ng tuloy-tuloy na suporta sa pagkain sa mga mahihirap na pamilya habang isinasagawa ang pangmatagalang hakbang laban sa kahirapan at kakulangan sa pagkain.
“Ito ay pagtupad sa vision [ni Pangulong Marcos] sa ating bansa na balang araw ay wala nang Pilipino na magugutom dahil hindi deserve ng kahit sinong Pilipino ang magutom. Kailangan responsibility ng national government at ng local government na siguraduhin na hindi nagugutom,” pahayag ni Punay.
Sa ganap na pagpapatupad ng programa, inaasahang aabot sa 371 benepisyaryo mula sa mga bayan ng Alcantara, Cajidiocan, Corcuera, Odiongan, Romblon, San Andres, San Fernando, San Jose, at Santa Fe ang makatatanggap ng tulong.
Pinili ang mga benepisyaryo batay sa Listahanan 3 survey sa ilalim ng National Household Targeting System for Poverty Reduction. Sumailalim din ang mga pamilyang kabilang sa pinakamahihirap na sektor sa pagsusuri gamit ang Walang Gutom Indicator Tool upang matukoy ang kanilang antas ng food security.
Sa ilalim ng programa, makatatanggap ang bawat benepisyaryo ng ₱3,000 na monthly food credits sa pamamagitan ng Electronic Benefit Transfer (EBT) card. Maaari itong gamitin sa pagbili ng bigas, gulay, manok, at baboy.
“Ang maganda dito sa ating Walang Gutom program, ito ay non-monetary assistance. Ibig sabihin, binibigyan natin sila ng Electronic Benefit Transfer card na gagamitin nila for redemption. Doon natin niloload ’yung food credits nila, hindi siya convertible to cash, gagamitin mo lang pagmagre-redeem ka para masigurong pagkain ’yung nabibigay natin sa kanila at hindi pera,” paliwanag ni Punay.
Nagpasalamat naman ang isa sa mga benepisyaryo na si Ana Sulungon mula sa Barangay Patoo sa Odiongan, at sinabing malaking tulong ang programa para sa kanyang mga anak.
“Maraming salamat po sa Panginoon at kay Pangulong Bongbong Marcos. Sa DSWD, sana marami pang matulungang katulad naming mahihirap. Malaking tulong po ito para sa mga anak ko kasi ’yung kinikita ko lang araw-araw ay para lang sa pag-aaral nila at kulang pa sa pagkain,” ani Sulungon.
Inaasahang matatanggap ng mga benepisyaryo ang tulong nang regular sa loob ng tatlong taon sa ilalim ng programa.
Discussion about this post