Pinuri ng mga netizen si ISIAH Hospital and Medical Center CEO Diven Dimaala matapos nitong tulungan ang isang pasyenteng hindi kayang bayaran ang kanyang hospital bill.
Batay sa salaysay ng pasyente, isinugod sa ospital ang kanilang kamag-anak matapos mahiwa ng grinder ang kamay at kinailangang operahan. Nakatakda na sana itong ma-discharge ngunit may natitira pa itong mahigit ₱29,000 na bayarin sa ospital.
Nang lumapit ang pasyente kay Dimaala upang humingi ng tulong, agad umano itong tumugon at pinatawad ang kabuuang balanse, kaya nakalabas na ng ospital ang pasyente nang walang binabayaran.
Hindi lamang ito ang naitalang pagtulong ng CEO. Sa ilang video na ibinahagi ni Dimaala, makikitang may iba pang pasyente ang hindi na pinagbabayad bilang bahagi ng kanyang personal na tulong, kabilang ang ilan mula sa bayan ng Ferrol at mula sa isla ng Sibuyan.
Sa social media, sunod-sunod ang papuri mula sa mga netizen. Ayon kay Meriam Lilla, “Mabuting tao talaga si Vice Diven, kudos to you, God bless.”
Ibinahagi naman ni Jeiah Gara na mababait umano ang mga doktor at nars sa ospital at kampante ang mga pasyente sa kanilang serbisyo. Tinawag ding “parang good Samaritan” si Dimaala ni netizen Ciriaco.
Samantala, nagpasalamat naman si Russel Fortaleza sa natanggap na tulong ng kanyang kapatid, at sinabing, “God bless always doc, sana marami ka pang matulungan na mga mahihirap.”
Sa isang panayam, sinabi ni Dimaala na likas na umano sa kanya ang pagtulong, lalo na sa mga kababayan na walang kakayahang pinansyal. Ayon sa kanya, mas mahalaga ang kaligtasan at kalusugan ng pasyente.
Dagdag pa niya, marami pa rin aniyang mga pasyente ang nahihirapang tustusan ang gastusing medikal, kaya hangga’t may kakayahan siya, patuloy niyang tutugunan ang kanilang pangangailangan.
Umaasa rin siya na mas marami pang indibidwal at institusyon ang magtutulungan upang matiyak na walang pasyente ang mapapabayaan dahil lamang sa kakulangan sa pera.
