Inirereklamo ngayon ng tangkang pagpatay ang dalawang 22-anyos na lalaki matapos umano nilang bugbugin gamit ang isang metal rod ang dalawang lalaking naglalakad sa Barangay Poblacion, Looc, Romblon noong Sabado ng gabi, January 17.
Batay sa imbestigasyon ng Looc Municipal Police Station, naglalakad pauwi ang mga biktima sa kahabaan ng barangay road sa Sitio Sto. Niño nang dumaan ang motorsiklo ng mga suspek sa mabilis na takbo. Sinita umano ng mga biktima ang driver at hiniling na magmenor dahil may mga asong nasa kalsada.
Dito umano nagalit ang mga suspek at biglang nag-U-turn ang kanilang motorsiklo upang komprontahin ang dalawang biktima.
Matapos ang maikling pagtatalo, umalis ang magkabilang panig, subalit makalipas ang ilang sandali ay muling sumigaw ang mga suspek mula sa malayo.
Nang lapitan ng mga biktima ang dalawa upang alamin ang dahilan, bigla na lamang umanong inatake ng isa sa mga suspek ang dalawang biktima gamit ang isang metal rod.
Nakatakas ang isa sa mga biktima at humingi ng tulong sa mga residente, habang patuloy namang binugbog ang kanyang kasama hanggang sa mawalan ng malay.
Agad na rumesponde ang pulisya at dinala ang mga biktima sa Don Modesto Hospital para sa agarang gamutan.
Naaresto na ang dalawang suspek at kasalukuyang nasa kustodiya ng Looc MPS. Inihahanda na ang kasong Attempted Murder laban sa kanila.
