Nagsagawa ng mandatory drug testing ang pamahalaang panlalawigan ng Romblon para sa lahat ng kawani ng Provincial Capitol katuwang ang Philippine Drug Enforcement Agency (PDEA), bilang bahagi ng pagpapatupad ng drug-free workplace sa lokal na pamahalaan.
Pinangunahan ni Governor Trina Firmalo-Fabic ang aktibidad, kung saan nakilahok ang mga empleyado ng kapitolyo sa isinagawang pagsusuri. Layunin ng hakbang na matiyak ang malinis at maayos na serbisyo publiko at mapanatili ang integridad ng mga kawani ng gobyerno.
Bukod sa drug testing, hiniling din ng gobernador sa PDEA ang pagsasagawa ng karagdagang lectures at seminars upang palakasin ang kampanya kontra droga ng pamahalaang panlalawigan.
Ayon kay Governor Fabic, mahalagang manatiling malinis sa ilegal na droga ang mga kawani ng gobyerno upang mapanatili ang kredibilidad ng serbisyo publiko, at kung may magpositibo man, handa ang pamahalaan na tumulong at magbigay ng mga opsyon, kabilang ang rehabilitasyon, para sa ikabubuti ng indibidwal at ng workplace.
Patuloy naman umanong isusulong ng pamahalaang panlalawigan ang mga programang magpapatibay sa kampanya laban sa ilegal na droga at sa pagtataguyod ng ligtas at maayos na kapaligiran sa trabaho.
Discussion about this post