Dumating na sa bayan ng Cajidiocan ang dalawang bagong ambulansya na binili ng lokal na pamahalaan bilang bahagi ng pagpapalakas ng serbisyong pangkalusugan at agarang pagtugon sa mga emergency sa mga barangay.
Ayon kay Cajidiocan Mayor Marvin Ramos, ilalaan ang isang ambulansya sa Satellite Clinic ng Brgy. Danao at ang isa naman ay sa Satellite Clinic ng Brgy. Lumbang Este. Opisyal na iti-turn over ang mga ito sa sandaling maging bukas at ganap nang operational ang dalawang satellite clinic na inaasahang magsisimula ngayong taon.
Sa kasalukuyan ay may limang ambulansya na ang bayan. Inaasahan pa ang pagdating ng dalawa pang bagong unit bago matapos ang taon, na magpapalawak pa sa kakayahan ng lokal na pamahalaan sa pagresponde sa mga medikal na insidente.
Binigyang-diin ni Ramos na prayoridad ng kanyang administrasyon ang paglalagay ng ambulansya sa mga barangay upang mas mapabilis ang pagresponde sa oras ng pangangailangan. Target ng alkalde na bago matapos ang kanyang termino ay magkaroon ng nakatalagang ambulansya ang lahat ng 14 na barangay sa Cajidiocan upang mas mailapit ang serbisyong medikal sa mga residente.
Discussion about this post