Pinabibilis na ni Odiongan Mayor Roger Fodra Jr. sa Bantay Presyo Task Force ang pagbalangkas ng Implementing Rules and Regulations (IRR) para sa pagpapatupad ng ordinansa na magbabantay sa bentahan ng live weight ng baboy sa mga barangay.
Sa panayam nitong Lunes, February 9, sinabi ni Fodra na fina-finalize na lamang ng task force ang IRR bago ito ilabas at ipatupad.
Ayon sa alkalde, kabilang sa mga probisyon ng IRR ang paggamit ng Timbangan ng Bayan, na magsisilbing opisyal na lugar kung saan kikiluhin ang mga baboy. Dito ay magiging saksi ang nagbebenta, ang bumibili, at ang inspektor na pipirma sa sertipiko bilang patunay na nagkaroon ng bentahan.
Sinabi ni Fodra na layunin ng hakbang na maprotektahan ang mga backyard hog raisers laban sa pagkalugi.
Kasunod ito ng mga sumbong na may mga baboy na binibili sa halagang P160 hanggang P170 kada kilo, sa halip na itinakdang P190 hanggang P200 kada kilo, depende sa klase ng baboy.
Ang task force din ang inatasang magsagawa ng pag-aaral sa estado ng swine industry sa bayan at maaaring magrekomenda ng pagtaas o pagbaba ng price ceiling kung kinakailangan.
Ayon pa sa alkalde, mahalagang maipatupad ang ordinansa upang maprotektahan ang mga hog raisers at mapanatili ang industriya ng pagbababoy sa bayan sa kabila ng mga hamon, kabilang ang banta ng African Swine Fever at pagtaas ng presyo ng mga pakain.
Bagaman wala pang IRR, sinabi ng alkalde na epektibo na ang ordinansang ipinasa ng Sangguniang Bayan na nagtatakda sa presyo ng live weight ng baboy.
