Nangako si Governor Trina Firmalo-Fabic na patuloy na makikiisa ang Pamahalaang Panlalawigan sa pangangalaga at pagprotekta sa Mt. Guiting-Guiting Natural Park kasabay ng pagdiriwang ng ika-30 anibersaryo ng pagkakatatag nito nitong February 20.
Sa kanyang mensahe sa ginanap na programa sa bayan ng San Fernando bilang bahagi ng taunang Mt. Guiting-Guiting Day, binigyang-diin ng gobernador ang kahalagahan ng isla ng Sibuyan at ng bundok na nagsisilbing puso ng likas-yaman ng lalawigan.
“Sobrang ganda ng isla ng Sibuyan at hindi lang ’yun, ito ang bumubuhay sa mga Sibuyanon,” ani Fabic.
“Sana po naramdaman ninyo na ang Pamahalaang Panlalawigan ay nandito para umagapay at sumuporta sa pagprotekta sa isla ng Sibuyan lalo na sa Mt. Guiting-Guiting Natural Park,” dagdag pa nito.
Ayon pa sa kanya, ang Mt. Guiting-Guiting ay hindi lamang isang bundok kundi simbolo ng pagkakakilanlan at katatagan ng mga Sibuyanon.
“Ito ay pananagutan natin bilang tagapangalaga ng kalikasan. Sama-sama nating pangalagaan ang yaman na ito para sa kinabukasan ng ating mga anak,” dagdag pa ng gobernador.
Ang Mt. Guiting-Guiting Natural Park ay idineklarang protektadong lugar noong 1996 sa pamamagitan ng Proclamation No. 296, alinsunod sa National Integrated Protected Areas System (NIPAS) Act of 1992. Layunin ng batas na mapangalagaan ang natatanging biodiversity ng lugar, kabilang ang mga endemic na halaman at hayop na matatagpuan lamang sa isla ng Sibuyan, na tinaguriang “Galápagos of Asia” dahil sa pambihirang dami ng natatanging species.
Noong 2018, lalo pang pinagtibay ang proteksyon sa lugar sa bisa ng Expanded NIPAS Act (Republic Act No. 11038), kung saan kinilala ang Mt. Guiting-Guiting Natural Park bilang isa sa mga mahahalagang protected areas sa bansa.
Sa loob ng tatlong dekada, nananatiling sentro ng konserbasyon, pananaliksik, at responsableng turismo ang Mt. Guiting-Guiting.
Discussion about this post