Patuloy ang pagtulong ng dating bise alkalde ng Odiongan at ISIAH Hospital and Medical Center CEO na si Diven Dimaala sa mga pasyenteng kapos sa pera, matapos nitong tulungan ang isa pang pasyente nitong Lunes sa pamamagitan ng paglibre sa natitirang bayarin nito sa ospital.
Ayon sa ulat, may balanse pang aabot sa ₱28,000 ang pasyente sa kanyang hospital bill at hindi na ito kayang bayaran ng pamilya. Dahil dito, lumapit ang pasyente kay Dimaala upang humingi ng tulong.
Agad umanong tumugon ang CEO at nilibre ang kabuuang balanse, dahilan upang makalabas na ng ospital ang pasyente nang wala nang iniintinding bayarin.
Hindi na ito ang unang pagkakataon na personal na tumulong si Dimaala sa mga pasyenteng nangangailangan. Sa mga naunang ulat at video na ibinahagi nito, ilang pasyente na rin ang kanyang natulungan sa pamamagitan ng pag-absorb sa kanilang mga natitirang hospital bill.
Sa isang panayam, sinabi ni Dimaala na patuloy siyang tutulong hangga’t may kakayahan, lalo na sa mga pasyenteng walang sapat na pambili ng gamutan.
“Gusto ko kasing ipakita sa community na hindi lang pang mayaman itong private hospital. Kapag mahirap, kaya rin namin mag zero-balance billing,” ayon kay Dimaala.
Ayon sa kanya, mas mahalaga ang kaligtasan at kalusugan ng pasyente kaysa sa anumang bayarin.
Ang ISIAH Hospital ang nag-iisang private hospital sa Romblon na level 1 facility na tumatanggap ng mga pasyenteng nangangailangan ng mga pangunahing serbisyong medikal. Kabilang sa mga serbisyong iniaalok nito ang 24-oras na emergency room, in-patient services, minor at major surgical procedures, laboratory at diagnostic services, radiology, pharmacy, at maternity care.
Layunin ng pamunuan ng ospital na mapalawak pa ang kanilang serbisyo upang mas maraming pasyente sa probinsya ang mabigyan ng de-kalidad at abot-kayang gamutan.
