Tinatarget ng pamahalaang bayan ng Odiongan ang pagtatayo ng isang cold storage facility bilang bahagi ng programang pang–food security na layong makatulong sa mga magsasaka at mangingisda sa bayan.
Sa panayam, sinabi ni Vice Mayor Michael Arevalo na pangunahing prayoridad ng lokal na pamahalaan ang pagtulong sa sektor ng agrikultura at pangingisda upang mapanatili ang sapat na suplay ng pagkain sa komunidad.
“Yang tinatawag na food security ay pangunahin talaga nating programa yan kaya dapat alalayanin talaga natin ang mga farmers. Kung tutuosin nga, dapat nga may subsidy talaga tayo sa kanila,” ayon kay Arevalo.
Dagdag pa ng bise alkalde, kasalukuyan nang nakikipag-ugnayan ang lokal na pamahalaan sa Department of Agriculture (DA) MIMAROPA upang makakuha ng interbensyon para sa mga magsasaka at mangingisda sa bayan.
“Nakikipag-ugnayan na tayo sa DA MIMAROPA na magawan ng intervention ang mga farmers at mangingisda. Kagaya ng sa isda, hindi natin mapigilang mailabas yan dahil wala tayong cold storage facility,” ani Arevalo.
Kung maaaprubahan ang kanilang kahilingan, planong magtayo ang LGU ng isang bagsakan center sa Odiongan Public Market na may kasamang cold storage facility. Sa kasalukuyan, hinihintay pa ang pondo mula sa DA para sa nasabing proyekto.
Ipinaliwanag ni Arevalo na malaking tulong ang pasilidad upang maiimbak ang mga huling isda kapag may sobra sa suplay, sa halip na agad itong ibiyahe palabas ng bayan.
“Kung mapapansin niyo, pag marami ang isda, binabiyahe agad paluwas pero after two days, wala na tayong isda, tayo ang nauubusan, mga consumers,” paliwanag niya.
Inaasahan ng lokal na pamahalaan na kapag naipatayo ang cold storage facility, mas mapapanatili ang suplay ng isda at iba pang produkto sa pamilihan, at mas mabibigyan ng proteksiyon ang kita ng mga magsasaka at mangingisda sa Odiongan.
