Limang bagong motorsiklo na gagamitin sa pagpapatrolya ang ipinagkaloob ng tanggapan ni Congressman Eleandro Madrona sa mga tauhan ng Highway Patrol Team (HPT) at Romblon Police Mobile Force Company (RPMFC) sa lalawigan.
Isinagawa ang turnover ng mga motorsiklo sa Odiongan, na layong mapalakas ang mobility at presensya ng kapulisan sa mga pangunahing kalsada at komunidad sa Romblon.
Ayon kay Madrona, makatutulong ang mga bagong mobility asset upang higit pang mapahusay ang kakayahan ng mga pulis sa pagpapanatili ng kapayapaan at kaayusan sa lalawigan.
Nagpaabot naman ng pasasalamat si Police BGen. Jovencio Badua Jr., Regional Director ng Police Regional Office MIMAROPA, sa pamamagitan ni Police Col. Hordan Pacatiw, Deputy Regional Director for Operations.
Ayon kay Pacatiw, ang mga ipinagkaloob na motorsiklo ay hindi lamang mga sasakyan kundi simbolo rin ng matibay na suporta at ugnayan sa pagitan ng Pambansang Pulisya at ng mga lider ng lalawigan.
Binigyang-diin din ni Madrona ang mahalagang papel ng peace and order sa patuloy na pag-unlad ng Romblon at tiniyak ang kanyang patuloy na suporta sa hanay ng kapulisan.
Discussion about this post