Apatnapu’t limang magkapareha ang opisyal na nagpakasal sa isinagawang Kasalang Bayan 2026 ng Tanggapan ng Municipal Civil Registrar ng Odiongan noong Pebrero 26, 2026.
Ginanap ang seremonya sa La Marietta Events sa Barangay Tulay, sa pakikipagtulungan ng Lokal na Pamahalaan ng Odiongan.
Layunin ng programa na mabigyan ng libreng serbisyong pagpapakasal ang mga mag-asawang may limitadong kakayahang pinansyal ngunit nagnanais gawing legal ang kanilang pagsasama.
Bago ang aktuwal na seremonya, tiniyak ng Municipal Civil Registrar na kumpleto at naaayon sa mga probisyon ng Family Code of the Philippines at iba pang umiiral na batas sa civil registration ang lahat ng dokumento ng mga kalahok.
Pinangunahan ni Odiongan Mayor Roger Fodra Jr. ang seremonya sa harap ng mga ninong at ninang, pamilya, at mga panauhin. Nakiisa rin ang mga kinatawan ng Philippine Statistics Authority upang matiyak ang maayos na dokumentasyon ng mga kasal alinsunod sa mandato ng Republic Act No. 10625.
Ayon sa Municipal Civil Registrar, layunin ng aktibidad na palakasin ang pagpapahalaga sa kasal bilang mahalagang institusyong panlipunan at mapatatag ang pundasyon ng pamilya sa komunidad. Sa pamamagitan nito, masisiguro rin ang mga legal na karapatan at benepisyo ng mga mag-asawa at kanilang mga anak.
