Pasado na sa antas ng komite ang isang panukalang ordinansa sa Committee on Infrastructure ng Sangguniang Bayan ng Odiongan na naglalayong magbigay ng exemption sa pagkuha ng building permit para sa mga bahay na ginagamit ang bahagi ng espasyo bilang sari-sari store o kahalintulad na maliliit na negosyo.
Ayon sa may akda ng ordinansa na si Konsehal Juvy Faderogaya, maraming maliliit na negosyante ang napipilitang magsara dahil mas mataas pa umano ang gastos sa pagkuha ng building permit kumpara sa kapital ng kanilang tindahan, lalo na kung minor repair works lamang ang isinasagawa sa kanilang mga bahay.
Ibinahagi ni Faderogaya na noong 2025 ay mahigit 500 residente ng Odiongan ang kanyang natulungan sa pamamagitan ng libreng paggawa ng architectural at civil plans upang makasunod lamang sa mga requirements sa permit. Aniya, malinaw na pasanin ito para sa maliliit na negosyong ang layunin ay makapaghanapbuhay lamang.
Upang maiwasan ang ganitong suliranin, isinusulong ng ordinansa ang pag-e-exempt sa mga negosyong matatagpuan sa loob ng residential houses, basta’t walang isasagawang expansion o structural alteration sa orihinal na gusali.
Kabilang sa mga minor works na maaaring i-exempt sa pagkuha ng building permit ang pagpapalit ng roofing sheets nang walang pagbabago sa trusses o framing, ceiling repairs, wall repairs gamit ang light materials, painting at iba pang finishing works, floor repairs at tiling, pati ang repair o replacement ng mga pinto, bintana, at grills.
Saklaw din ng exemption ang paglalagay ng mga store fit-outs at fixtures gaya ng shelves at counters, construction ng partitions, paglalagay ng signages na low-voltage lamang ang kinakailangan, at minor plumbing at electrical works.
Gayunman, nilinaw ni Faderogaya na may mga limitasyon ang panukala. Ayon sa kanya, ang exemption ay para lamang sa mga gusaling may naunang building permit noong itinayo ang bahay bilang tirahan at para lamang sa minor repairs upang magamit ang bahagi nito bilang tindahan o kainan.
Binigyang-diin din ni Faderogaya, na isang Architect, na ang panukalang ordinansa ay hindi lalabag sa National Building Code. Aniya, malinaw na nakasaad sa batas na hindi na kailangan ng building permit para sa ilang minor constructions at repairs, hangga’t hindi ito lumalabag sa anumang probisyon ng Code at ng Implementing Rules and Regulations nito.
