Nahaharap sa kasong paglabag sa Republic Act 9165 o ang Comprehensive Dangerous Drugs Act of 2002 ang isang 31-anyos na lalaki matapos umanong mahulihan ng ilegal na droga sa ikinasang buy-bust operation ng kapulisan kagabi, January 28, sa Barangay Tuburan, Odiongan, Romblon.
Kinilala ng pulisya ang suspek sa alyas na “Ricky,” 31 taong gulang, may kinakasama, walang trabaho, at residente ng nasabing barangay.
Ayon sa pulisya, nakabili umano ang isang operatiba ng Odiongan Municipal Police Station sa suspek ng isang heat-sealed transparent plastic sachet na naglalaman ng hinihinalang ilegal na droga kapalit ng halagang ₱500 na ginamit bilang marked money.
Sa isinagawang body search, narekober pa mula sa suspek ang isa pang sachet na naglalaman ng hinihinalang shabu, ang ₱500 marked money, isang pouch wallet, at isang unit ng motorsiklo.
Dinala ang suspek sa kustodiya ng Odiongan MPS para sa kaukulang dokumentasyon at disposisyon. Inihahanda na ang pagsasampa ng kaso laban sa kanya sa paglabag sa Section 5 at Section 11, Article II ng RA 9165 sa pamamagitan ng inquest proceeding sa Provincial Prosecutor’s Office sa Odiongan.
Tumanggi namang lumagda sa inventory receipt ang suspek at mariing itinanggi ang mga paratang na ibinabato laban sa kanya.
