Arestado ang isang 43-anyos na vendor matapos umanong makuhanan ng ipinagbabawal na droga sa ikinasang anti-illegal drug buy-bust operation sa Barangay Liwayway, Odiongan, Romblon kamakailan.
Batay sa ulat ng Odiongan Municipal Police Station, ang suspek ay residente ng Barangay Batiano sa nasabing bayan at tubong Bansud, Oriental Mindoro. Isinagawa ang operasyon katuwang ang Romblon Provincial Mobile Force Company matapos makatanggap ng impormasyon hinggil sa umano’y iligal na gawain ng suspek.
Nabilhan umano ng mga operatiba ang suspek ng isang sachet ng pinaghihinalaang shabu na nagkakahalaga ng ₱500. Matapos ang transaksyon ay agad itong inaresto ng mga pulis.
Sa isinagawang body search, nakarekober pa ang mga awtoridad ng tatlong karagdagang sachet ng hinihinalang shabu mula sa pag-iingat ng suspek.
Kasalukuyang nakakulong ang suspek at inihahanda na ang kaukulang kaso laban sa kanya sa paglabag sa Republic Act 9165 o ang Comprehensive Dangerous Drugs Act of 2002.
