Nakapagtala ng panibagong tagumpay ang Team Romblon sa larangan ng football matapos nitong magtapos bilang 1st runner-up sa katatapos lamang na Philippine Football Federation (PFF) Under 16 Boys Regional Qualifiers Tournament – Luzon Cluster A na ginanap mula December 6 hanggang 13, 2025 sa PFF National Training Center sa Carmona, Cavite.
Nilahukan ang torneo ng iba’t ibang football associations mula sa Luzon, kabilang ang Batangas Football Association, Laguna Football Association, Palawan Puerto Princesa Football Association, National Capital Region Football Association, Rizal Football Association, at Romblon Football Association na kumatawan sa MIMAROPA Regional Football Association matapos magkampeon sa Domestic Tournament noong Agosto sa Calapan.
Binubuo ang Team Romblon ng 17 student-athletes mula sa bayan ng Romblon at Cajidiocan. Kabilang sa mga manlalaro sina Aljo Escalada, Steven Teodoro, John Albert Fajiculay, Aljur Mortel, Luke Brion Madrona, Vincent Morron, Rainer Rotoni, Jashpyr Sy, Nikko Riano, Jashmeer Mirabete, Miguel Manzo, Kurt Madali, Jesean Carabbacan, James Magada, Prince Carl Madeja, Arsenio Dela Cruz, Rafael Villanueva, at mula sa Cajidiocan si Ivan Liao. Pinamunuan ang koponan ni Head Coach Loui John Valeroso, katuwang si Assistant Coach Francis Mabasa.
Sa kanilang unang laban, tinalo ng Team Romblon ang Palawan Puerto Princesa Football Association sa iskor na 2–1, sa pamamagitan ng mga goal nina Ivan Liao at Anjo Escalada. Sinundan ito ng panalo kontra Laguna Football Association, 4–1, kung saan nagtala ng hat trick si Ivan Liao habang nagdagdag ng isang goal si Prince Madeja.
Sa ikatlong laro, nagtapos sa 2–2 draw ang laban kontra Batangas Football Association, kung saan nagmula ang mga goal ng Romblon kina Anjo Escalada at James Magada. Sa ikaapat na laban, natalo ang Romblon ng NCR Football Association, 1–9, kung saan ang nag-iisang goal ng koponan ay muli ring mula kay Ivan Liao. Nakabawi naman ang Romblon sa ikalimang laro matapos talunin ang Rizal Football Association sa iskor na 6–1, sa tulong ng dalawang goal ni James Magada at tig-iisang goal nina Anjo Escalada, Arsenio Dela Cruz, Rafael Villanueva, at Ivan Liao.
Bagama’t kinapos sa laban kontra NCR na nagresulta sa pagkabigo sa kampeonato, ipinakita ng Team Romblon ang kakayahan nitong makipagsabayan sa mga football powerhouse ng Luzon. Sa kauna-unahang pagkakataon bilang kinatawan ng MIMAROPA sa nasabing qualifiers, ang pagkamit ng 1st runner-up finish ay itinuturing na mahalagang hakbang para sa patuloy na pag-unlad ng football sa lalawigan ng Romblon. Sa hinaharap, hindi rin isinasantabi ang posibilidad na may mga manlalaro mula sa koponan ang mapabilang sa mas mataas na antas ng kompetisyon, kabilang ang pambansang koponan.
