Arestado ang isang 35-anyos na laborer mula sa Barangay Liwayway, Odiongan, Romblon matapos umanong mabilhan ng ipinagbabawal na droga sa isinagawang buy-bust operation ng Odiongan Municipal Police Station noong gabi ng Lunes, Disyembre 22.
Batay sa ulat ng pulisya, isang sachet ng pinaghihinalaang shabu na nagkakahalaga ng ₱500 ang umano’y nabili sa suspek ng isang police poseur-buyer. Agad itong inaresto matapos ang transaksiyon.
Sa isinagawang body search, nakakuha pa umano ang mga awtoridad ng ilang karagdagang sachet ng pinaghihinalaang shabu mula sa suspek. Tinatayang aabot sa ₱3,000 ang kabuuang halaga ng mga nakumpiskang iligal na droga.
Dinala na sa Romblon Provincial Crime Laboratory Office ang mga nakuhang ebidensya upang sumailalim sa pagsusuri.
Nakakulong na ngayon ang suspek at mahaharap sa mga kasong paglabag sa Comprehensive Dangerous Drugs Act of 2002. Wala namang pahayag ang suspek kaugnay ng insidente.
