Muling nakabalik sa rurok ng tagumpay ang College of St. Benilde Chess Masters matapos masungkit ang kampeonato sa NCAA Season 101 Chess Competition, pitong taon matapos ang kanilang huling titulo. Tinalo ng CSB ang Lyceum of the Philippines University (LPU) sa score na 3–1 sa finals na ginanap noong December 6, 2025 sa The Pearl Hotel Manila.
Pinangunahan ni National Master at Arena International Master Jasper Faeldonia, 20-anyos mula Odiongan, Romblon, at kasalukuyang 2nd Year BS Marketing Management student, ang CSB sa pagkuha ng titulo. Naglaro siya sa Board 1 at nakuha ang mahalagang panalo kontra kay Freddie Casabuena ng LPU. Sa Board 2, nagtapos sa tabla sina Khent Darylle Delig (CSB) at Jeremy Marticio (LPU). Panalo naman si Daniel Baylosis ng CSB sa Board 3 laban kay Del Emerson De la Cruz ng LPU, habang nauwi rin sa tabla ang laban nina John Laurence Donguines (CSB) at Ariel Santander (LPU) sa Board 4.
Bago marating ng St. Benilde ang finals, hinarap muna nila ang top seed na University of Perpetual Help System Dalta (UPHSD), na may twice-to-beat advantage. Tinalo ng CSB ang UPHSD sa Game 1, 3–1, upang ipwersa ang do-or-die match. Sa Game 2, isang draw na lamang ang kailangan ng CSB para umabante, at nagtapos ang laban sa 2–2, na nagbigay daan sa kanilang pagpasok sa championship round.
Sa kabilang bracket, nakapasok naman sa finals ang LPU matapos nilang talunin ang defending champion na San Beda.
Sa pagtatapos ng torneo, itinanghal si Jasper Faeldonia bilang NCAA Season 101 Finals MVP – Seniors Division.
Samantala, sa Juniors Division, nagpakita rin ng matatag na kampanya ang nakababatang kapatid ni Jasper na si Jerick Faeldonia, 15-anyos na Arena International Master at Grade 10 student ng Arellano University. Nagwagi si Jerick ng malinis na 9-round elimination run na walang talo. Bagama’t hindi umusad sa finals matapos na mabigo kontra Lyceum of the Philippines sa semifinals, nakabawi ang Arellano sa kanilang 3.5–0.5 na panalo laban sa UPHSD upang makuha ang 2nd runner-up finish.
Isa sa mga puntos ng Arellano ay nagmula kay Jerick matapos niyang talunin si Khent Lourence Canas sa Board 3. Nanalo rin ang kanyang mga kakampi: tinalo ni Stephen Zane Quinto si NM Yuri Lei Paraguya sa Board 1, at nakuha ni Gabriel James Cartel ang panalo laban kay Han Jaeu sa Board 2. Nagtabla naman sina Mark Jayson Borden at David Leonard Azuela sa Board 4.
Ang magkapatid na Jasper at Jerick Faeldonia ay ilan lamang sa mga batang manlalaro mula sa Romblon na patuloy na nagpapakita ng potensyal sa chess at maaring mas lalo pang umangat kung magkakaroon ng mas pinalakas na training at programa para sa mga kabataang atleta sa lalawigan.
