Arestado ang tatlong lalaki sa ikinasang operasyon ng pulisya laban sa ilegal na tupada nitong Linggo sa Sitio Canlumay, Barangay Tumingad, Odiongan, Romblon.
Kinilala ang mga suspek na sina alyas Rey, 36, construction worker; alyas Orlan, 29, construction worker; at alyas Mike, 46, driver. Pawang residente ng Odiongan ang tatlo.
Batay sa ulat ng Odiongan Municipal Police Station (OMPS), nakatanggap ng impormasyon mula sa isang concerned citizen ang kanilang himpilan tungkol sa nagaganap na ilegal na sabong. Agad nagresponde ang mga tauhan ng OMPS kasama ang PIU Romblon at PMFC upang beripikahin ang sumbong.
Pagdating sa lugar, naaktuhan umano ng mga operatiba ang aktwal na tupada. Nang magpakilala ang mga pulis, nagsitakbuhan ang mga mananabong ngunit nadakip ang tatlo.
Nakumpiska mula sa kanila ang dalawang sasabunging manok, P700 cash, mga tari, tali, electrical tape, at iba pang gamit sa sabong. Wala umanong naipakitang permit ang grupo para sa naturang aktibidad.
Nahaharap ngayon ang tatlo sa kasong paglabag sa Presidential Decree 1602 na ipinaabot na ng Odiongan Police sa piskalya para sa kaukulang disposition.
