Tiniyak ng Sangguniang Bayan ng Odiongan na hindi makakaltasan ng P400 ang social pension ng mga senior citizen sa bayan, matapos ang naging pagdinig ng Committee on Senior Citizens Affair sa planong pagbawas upang mapunan ang sinisingil ng Department of Social Welfare and Development (DSWD) sa LGU.
Nagmula ang usapin sa privilege speech ni SB Member Manuel Fernandez noong Lunes, kung saan iginiit niyang hindi siya pabor sa panukalang kaltas mula sa matatanggap na P3,000 social pension.
Nauna nang nilinaw ng ilang presidente ng senior citizens’ groups na ang umano’y “kaltas” ay boluntaryong kontribusyon sana mula sa seniors upang matulungan ang LGU na bayaran ang higit P1 milyon na sinisingil ng DSWD. Ang singil ay nag-ugat sa pag-release ng pension sa ilang benepisyaryo na hindi dumaan sa tamang validation noong unang dalawang quarter ng taon.
Gayunpaman, binigyang-diin ng mga opisyal ng DSWD Romblon na kahit boluntaryo, bawal pa rin ang naturang koleksyon lalo na’t ang pinanggagalingan ng kontribusyon ay ang social pension na dapat buong matanggap ng mga kwalipikadong senior citizen.
Ang social pension mula sa DSWD ay nakalaan para sa mahihirap na seniors na edad 60 pataas na walang regular na kita, pensyon, o sapat na suporta mula sa pamilya.
Sa parehong pagdinig, inirekomenda rin ng mga konsehal sa DSWD na pabilisin ang delisting ng mga senior citizen na patay na, lumipat ng tirahan, o hindi na kwalipikado, na tinatayang umaabot sa halos 600, upang mabigyan ng slot ang mga seniors na tunay na karapat-dapat mapasama sa programa.
Tiniyak ng komite na hindi maaapektuhan ang matatanggap na social pension ng mga benepisyaryo at walang kaltas na ipatutupad.
