Mula nang mabuo noong 2024, patuloy ang paglaki ng bilang ng mga miyembro ng Rizal FC, isang football club na binubuo ng mga student-athlete mula sa iba’t ibang bayan ng lalawigan ng Romblon.
Sa nakalipas na taon, sumabak ang koponan sa iba’t ibang football tournaments, at kasabay ng paglipas ng panahon ay kapansin-pansin ang pag-angat ng antas ng kanilang paglalaro.
Sa kasalukuyan, umaabot na sa halos 60 miyembro ang Rizal FC. Isa sa mga dahilan ng pagdami ng players ay ang patuloy na pagdalo ng mga student-athlete mula Romblon na lumilipat ng pag-aaral sa Maynila, kung saan sila ay bukas na tinatanggap ng mga naunang miyembro at binibigyan ng pagkakataong maging bahagi ng koponan.
Bunga ng lumalaking komunidad, napagkasunduan ng buong koponan na magsagawa ng Intra Club Tournament noong Nobyembre 16, 2025 sa Parqal Turf sa Parañaque. Ang torneo ay eksklusibo para sa mga miyembro ng Rizal FC at hinati ang koponan sa anim na teams. Nagsilbi itong practice matches ng bawat atleta bilang paghahanda para sa mga darating na kompetisyon. Sa kabuuan, naging matagumpay ang naturang Intra Club Tournament.
Kabilang sa mga student-athlete mula sa Romblon na bahagi ng Rizal FC sina Jem Paul Eurolpan ng Cajidiocan; Reymark Roz ng Romblon; Jay Repe ng Cajidiocan; Raynier Salvador ng Romblon; Welvin Manzo ng Romblon; Feihl John Romero ng San Fernando na dating RSU Olympic at Provincial Meet player; Joed Mortel ng Magdiwang; Abner Yasser Perez ng Magdiwang na dating Palarong Pambansa player; John Repil Capispisan ng Magdiwang na dating RSU Olympic at Provincial Meet player; Von Briant Mendez ng Odiongan na dating Provincial Meet player; Kem Fornal ng Romblon na dating Provincial Meet, RSU Olympic at Strasuc Olympic player; Aljade Luiz Gregorio ng San Fernando; Ronel Monton Oyao ng Magdiwang; at ang mga foreign players na sina Akwasi Spyce at Kwabena Paapa Asare Ankomah, kasama pa ang marami pang iba.
Sa patuloy na pagsigla ng koponan, inaasahang mas dadami pa ang mga miyembro ng Rizal FC at mas marami pang torneo ang kanilang sasabakan sa mga susunod na panahon.
