Nagpulong ang iba’t ibang ahensya ng pamahalaan sa MIMAROPA upang tiyaking handa ang rehiyon sa paglapit ng Bagyong Uwan.
Pinangunahan ng Office of Civil Defense (OCD) MIMAROPA ang Pre-Disaster Risk Assessment (PDRA) at scenario-building meeting na dinaluhan ng PAGASA, Mines and Geosciences Bureau (MGB), Department of Social Welfare and Development (DSWD), at iba pang regional offices.
Ayon sa PAGASA, posibleng mag-landfall ang bagyo sa Northern o Central Luzon sa Lunes, Nobyembre 10. Bagama’t hindi direktang tatama sa rehiyon, binigyang-diin ng OCD ang kahalagahan ng maagang paghahanda at koordinasyon ng mga response cluster at lokal na pamahalaan.
Sa ulat ng MGB MIMAROPA, wala sa kasalukuyan ang anumang barangay sa rehiyon na nasa panganib sa landslide o pagbaha. Sinabi ni Merari B. Rosaroso ng Geosciences Division na wala ring inaasahang hazards na dulot ng pag-ulan sa susunod na dalawa hanggang tatlong araw, ngunit patuloy pa rin ang kanilang monitoring sa posibleng pagbabago sa takbo ng bagyo.
Dagdag ng MGB, sa isang worst-case scenario na may pagbago sa direksyon ng hangin o bahagyang pagliyad ng bagyo pa-timog, maaaring maapektuhan ang Occidental Mindoro at kalapit na lugar kabilang ang Calamian Group of Islands.
Samantala, iniulat ng DSWD MIMAROPA, sa pangunguna ni Angela Villarta, na batay sa 72-hour accumulated rainfall forecast, walang inaasahang maaapektuhang residente o pamilyang nasa panganib sa buong rehiyon. Nananatiling naka-standby ang ahensya sa pamamagitan ng 105,086 prepositioned family food packs: 31,600 sa Occidental Mindoro, 35,800 sa Oriental Mindoro, 7,300 sa Marinduque, 27,800 sa Romblon, at 38,400 sa Palawan.
Kahit hindi direktang tatama ang Bagyong Uwan sa MIMAROPA, nagpapatuloy ang mga awtoridad sa pagtitiyak ng kahandaan upang maprotektahan ang mga komunidad laban sa anumang posibleng epekto ng masamang panahon.
